സെന്റ് ജെയിംസ് യു പി എസ് കരുവാറ്റ/ക്ലബ്ബുകൾ

പരിസ്ഥിതി ക്ലബ്ബ്

ലോക പരിസ്ഥിതി ദിനം

2021 – ജൂൺ – 5

ലോക പരിസ്ഥിതി ദിനത്തിൽ പരിസ്ഥിതി ക്ലബ്ബിന്റെ പ്രവർത്തനങ്ങൾക്ക് തുടക്കം കുറിച്ചു. തുടർന്ന് സ്കൂൾ വളപ്പിൽ ബഹുമാനപ്പെട്ട ഹെഡ്മ്സിട്രസ്സ് ലീന ടീച്ചർ വൃക്ഷത്തൈ നട്ട് പരിസ്ഥിതി പ്രവർത്തനങ്ങൾക്ക് തുടക്കം കുറിച്ചു. കോവിഡ് സാഹചര്യം നില നിൽക്കുന്നതുകൊണ്ട് വിദ്യാർഥികൾ ഗൂഗിൾ മീറ്റിലൂടെയാണ് ദിനാചരണത്തിൽ പങ്ക് ചേർന്നത്. വിദ്യാർഥികൾ അവരവരുടെ വീടുകളിൽ വൃക്ഷത്തൈ നട്ടുകൊണ്ട് പരിസ്ഥിരി ദിനത്തോടുള്ള ആദരവ് പ്രകടമാക്കി. തങ്ങൾ വൃക്ഷത്തൈ നടുന്നതിന്റെ ചിത്രങ്ങൾ സ്കൂൾ വാട്സാപ്പ് ഗ്രൂപ്പിലൂടെ പങ്കു വെയ്ക്കുകയും ചെയ്തു.

പരിസ്ഥിതി ദിന ചിത്രങ്ങൾ - 2021-22

വായനാ ക്ലബ്ബ്

വായനാ ദിനം

2021 – ജൂൺ – 19

‘വായിച്ചു വളരുക എന്ന സന്ദേശവുമായി കേരളമെങ്ങും സഞ്ചരിച്ച് പുസ്തകങ്ങളുടെ വിശാല ലോകത്തെ മലയാളികൾക്ക് പരിചയപ്പെടുത്തിയ പി എൻ പണിക്കരുടെ ചരമദിനം വായനാദിനമായി ആഘോഷിച്ചു. സ്കൂൾ ലൈബ്രറി വിപുലീകരിക്കുന്നതിനായി പരിസ്ഥിതി, നാട്ടറിവ്, കൃഷി തുടങ്ങിയ വിഷയങ്ങളിലെ പുസ്തകങ്ങൾ ഉൾപ്പെടുത്തി ഏകദേശം 10000 രൂപയുടെ പുസ്തകങ്ങൾ പൂർവ്വവിദ്യാർഥികൾ സ്കൂളിന് സംഭാവനയായി നൽകി. അന്നേദിവസം കൂടിയ ഓൺലൈൻ മീറ്റിങ്ങിൽ നേരത്തെ നിർദ്ദേശിച്ചതനുസരിച്ച് കുട്ടികൾ വായിച്ച അംബികാസുതൻ മാങ്ങാടിന്റെ ‘രണ്ട് മത്സ്യങ്ങൾ’ എന്ന കഥയുടെ വായനാനുഭവം കുട്ടികൾ പങ്കുവെച്ചു. തുടർന്ന് കുട്ടികൾ രചിച്ച കഥകളെക്കുറിച്ച് പ്രശസ്ത നോവലിസ്റ്റ് ശ്രീ. സലിം കുരിക്കളകത്ത് വളരെ വിശദമായി സംസാരിച്ചു. മികച്ച പത്ത് കഥകൾ അദ്ദേഹം തെരഞ്ഞെടുത്തു. കുട്ടികൾ അയച്ച എല്ലാ കഥകളെപ്പറ്റിയും അദ്ദേഹം മീറ്റിങ്ങിൽ പരാമർശിക്കുകയുണ്ടായി. കുട്ടികളുടെ സർഗ്ഗശേഷി പ്രോത്സാഹിപ്പിക്കുന്നതിനായി ഇത്തരം പ്രവർത്തനങ്ങൾ അനിവാര്യമാണെന്ന് അദ്ദേഹം അഭിപ്രായപ്പെട്ടു.

വായനാ ദിന ചിത്രങ്ങൾ - 2021-22
പുസ്തകവിതരണം
പോസ്റ്റർ

വിദ്യാരംഗം കലാസാഹിത്യ വേദി

എം എസ് ബാബുരാജ് ചരമദിനം

2021 – ഒക്ടോബർ – 7

മലയാള സിനിമയിലെ പ്രമുഖനായ സംഗീത സംവിധായകനായിരുന്നു എം എസ് ബാബുരാജ്. കോഴിക്കോട്ടുകാരനായ ഇദ്ദേഹത്തിന്റെ മുഴുവൻ പേര് മുഹമ്മദ് സബീർ ബാബുരാജ് എന്നാണ്. അദ്ദേഹത്തിന്റെ ഗാനങ്ങൾ വിസ്മരിക്കാതെ മലയാളികൾ ഓമനിക്കുന്നുണ്ട്. ഗസലുകളുടേയും മലബാർ മാപ്പിളപ്പാട്ടിന്റെയും ഹിന്ദുസ്ഥാനി സംഗീതത്തിന്റെയും ശ്രുതിമാധുരി മലയാളചലച്ചിത്രഗാനങ്ങളിൽ ആദ്യമായി ചേർത്തു തുടങ്ങിയതു അദ്ദേഹമായിരുന്നു. ഹിന്ദുസ്ഥാനി രാഗങ്ങൾ അന്യമായിരുന്ന ആ കാലഘട്ടത്തിൽ അദ്ദേഹത്തിന്റെ ഗാനങ്ങളിലൂടെ മലയാളചലച്ചിത്രരംഗം പുതിയ ഭാവുകത്വത്തിലെത്തി. അന്നേദിഅവസം അദ്ധ്യാപകനും സംഗീതജ്ഞനുമായ ശ്രീ സാബു പൊറ്റമേൽക്കടവ് കുട്ടികൾക്കായി ഓൺലൈനിൽ ഒരു സംഗീതവിരുന്നൊരുക്കി. എം എസ് ബാബുരാജിന്റെ പ്രശസ്തമായ ഗാനങ്ങളുടെ ഇൻസ്ടുമെന്റൽ മ്യൂസിക് കുട്ടികൾക്ക് വേണ്ടി അദ്ദേഹം വായിച്ചു. തുടർന്ന് വിവിധ തരം വാദ്യോപകരണങ്ങളെപ്പറ്റി കുട്ടികൾക്ക് വിവരിച്ചു നൽകി.

ആരോഗ്യ കായികം ക്ലബ്ബ്

ലോക മയക്കുമരുന്ന് വിരുദ്ധ ദിനം

2021 – ജൂൺ – 26

എല്ലാ വർഷവും ജൂൺ 26-നാണ് ലോക ലഹരി വിരുദ്ധ ദിനം ആചരിക്കുന്നത്. മയക്കുമരുന്നിന്റെ ഉപയോഗത്തിനും അനധികൃത കടത്തിനും എതിരായ സന്ദേശം പ്രചരിപ്പിക്കുന്നതിനായാണ് ഈ ദിനം ആചരിച്ചു പോരുന്നത്. 'ജീവൻ രക്ഷിക്കാൻ മയക്കുമരുന്നിനെ സംബന്ധിച്ച വസ്തുതകൾ പങ്കുവയ്ക്കുക' എന്നതാണ് 2021ലെ ലോക ലഹരിവിരുദ്ധ ദിനത്തിന്റെ ഔദ്യോഗിക പ്രമേയം. മയക്കുമരുന്നുമായി ബന്ധപ്പെട്ട വ്യാജ വിവരങ്ങളുടെ പ്രചരണം തടയുക, ശരിയായ വസ്തുതകളുടെ കൈമാറ്റം പ്രോത്സാഹിപ്പിക്കുക എന്നിവയാണ് ഈ പ്രമേയത്തിലൂടെ ലക്ഷ്യമിടുന്നത്. ലോക മയക്കുമരുന്ന് ദിനത്തോടനുബന്ധിച്ച് നമ്മുടെ സ്കൂളിൽ ഗാന്ധി യുവ കേന്ദ്ര സ്റ്റേറ്റ് കൗൺസിൽ ചെയർമാനായ അഡ്വക്കേറ്റ് നാസർ എം പൈങ്ങാമഠം കുട്ടികൾക്ക് ഓൺലൈനിലൂടെ ബോധവൽക്കരണ ക്ലാസ് നടത്തി.

ദേശീയ ഡോക്ടേഴ്സ് ദിനം

2021 – ജൂലൈ – 1

എല്ലാ വർഷവും ജുലൈ 1ന് ദേശീയ ഡോക്ടേഴ്സ് ദിനം ആചരിക്കുന്നു. കൊവിഡിനെതിരെയുള്ള പോരാട്ടത്തിൽ മുന്നിൽ നിന്ന് യുദ്ധം നയിക്കുന്നവരാണ് ഡോക്ടർമാർ. രാജ്യത്തെ സുരക്ഷിതമായി നിർത്തുക എന്ന വലിയ ഉത്തരവാദിത്തമാണ് ഇവർക്കുള്ളത്. ആരോഗ്യ കായികം ക്ലബ്ബിന്റെ നേതൃത്വത്തിൽ നമ്മുടെ വിദ്യാലയത്തിൽ ഡോക്ടേഴ്സ് ദിനം സമുചിതമായി ആചരിച്ചു. ഈ ദിനത്തിൽ ഡോക്ടർമാരെ അഭിനന്ദിക്കുന്നതിനായി വിദ്യാർഥികൾ ഡോക്ടറുമാരുടെ വേഷം ധരിച്ചുകൊണ്ട് അഭിനന്ദന സന്ദേശങ്ങൾ നൽകി. തുടർന്ന് ആരോഗ്യസുരക്ഷയേയും പോഷകാഹാരത്തെയും കുറിച്ച് ഡോക്ടർ ജോസഫ് തോമസ് ഗൂഗിൾ മീറ്റിലൂടെ വിദ്യാർഥികളോട് സംസാരിച്ചു.

ലിറ്റിൽ കൈറ്റ്സ് ക്ലബ്ബ്

കമ്പ്യൂട്ടർ സാക്ഷരതാ ദിനം

2021 – ഡിസംബർ – 2

2001 മുതലാണ് ലോക കമ്പ്യൂട്ടർ സാക്ഷരതാ ദിനം ആചരിച്ചു തുടങ്ങിയത്. ഇന്ന് ലോകത്ത് കമ്പ്യൂട്ടർ സാങ്കേതികവിദ്യ ഉപയോഗപ്പെടുത്തുന്നതിൽ നിലനിൽക്കുന്ന അന്തരം കുറയുക്കുന്നതിനുദ്ദേശിച്ചാണ് ഇത്തരമൊരു ദിനാചരണം നടത്തുന്നത്. അന്നേ ദിവസം സ്കുൾ ഐ.ടി കോർഡിനേറ്റർ വിദ്യാർഥികൾക്ക് കമ്പ്യൂട്ടർ ശാസ്ത്രം, വിവരവിനിമയ സാങ്കേതിക വിദ്യ എന്നിവയെപ്പറ്റി ഒരു സ്മാർട്ട് ക്ലാസ് നടത്തി.

ശാസ്ത്ര ക്ലബ്ബ്

ചാന്ദ്രദിനം

2021 – ജൂലൈ – 21

ആദ്യമായി മനുഷ്യൻ ചന്ദ്രനിൽ കാലുകുത്തിയതിന്റെ ഓർമ്മ അനുസ്മരിച്ചുകൊണ്ട് ചാന്ദ്രദിനം വളരെ ഭംഗിയായി ആഘോഷിച്ചു. അന്നേദിവസം സാമൂഹ്യ പ്രവർത്തകനും ശാസ്ത്ര സാഹിത്യ മിഷൻ മുൻ ജില്ലാ ഭാരവാഹിയുമായ ശ്രീ രാജശേഖര വാര്യർ ഗൂഗിൾ മീറ്റിലുടെ കുട്ടികളുമായി സംസാരിച്ചു. കുട്ടികൾക്ക് കാണുന്നതിനായി മുൻകൂട്ടി നൽകിയ വീഡിയോയെ ആസ്പദമാക്കി കുട്ടികൾ അവരുടെ അഭിപ്രായങ്ങളും സംശയങ്ങളും പങ്കുവെച്ചു. ചാന്ദ്രദിനപ്പതിപ്പ്, ചാന്ദ്രയാൻ മാതൃക എന്നിവയും കുട്ടികൾ തയ്യാറാക്കി.

സാമൂഹ്യ ശാസ്ത്ര ക്ലബ്ബ്

പിതൃദിനം

2021 – ജൂൺ – 21

കുടുംബത്തിനുവേണ്ടി അഹോരാത്രം പാടുപെടുന്ന പിതാക്കന്മാരെ ഓർക്കുന്നതിനും അവരോടുള്ള സ്നേഹവാത്സല്യങ്ങൾ പ്രകടിപ്പിക്കുന്നതിനുമുള്ള ദിനമാണ് പിതൃദിനം. പിതൃദിനത്തിൽ പിതാക്കന്മാരുമായി ചേർന്നുള്ള നിമിഷങ്ങൾ ചിത്രങ്ങളാക്കി വിദ്യാർഥികൾ സ്കൂൾ വാട്സാപ്പ് ഗ്രൂപ്പിലൂടെ പങ്കുവെച്ചു. പിതാവിനെപ്പറ്റിയുള്ള അനുഭവക്കുറിപ്പുകൾ, വീഡിയോ വിവരണങ്ങൾ, ക്രയോൺ-വാട്ടർ കളർ ചിത്രങ്ങൾ എന്നിവയും വിദ്യാർഥികൾ പങ്കുവെച്ചു.

സ്വാതന്ത്ര്യദിനം

2021 – ആഗസ്റ്റ് – 15

നമ്മുടെ രാജ്യം സ്വതന്ത്രമായതിന്റെ 75-ാം വാർഷികം സമുചിതമായി കൊണ്ടാടുകയുണ്ടായി. ബഹുമാനപ്പെട്ട വാർഡ് മെമ്പർ സനൽ കുമാർ സ്കൂളിൽ ത്രിവർണ്ണ പതാക ഉയർത്തി. അന്നേദിവസം കുട്ടികൾക്ക് സ്വാതന്ത്ര്യദിന സന്ദേശം നൽകിയത് വിരമിച്ച ഹൈസ്കൂൾ അദ്ധ്യാപകനും മുതിർന്ന ഗാന്ധിയനും കേരള സർവ്വോദയ മണ്ഡലം സെക്രട്ടറിയുമായ ശ്രീ കാട്ടായിക്കോണം ശശിധരൻ മാഷായിരുന്നു. അമൃത മഹോത്സവത്തിന്റെ ഭാഗമായി നടന്ന ചിത്രരചന, ദേശഭക്തിഗാനം, പ്രസംഗം എന്നീ മത്സരങ്ങളിൽ ആരോമൽ, അരുണിമ, റൂബിൾ എന്നിവർ വിജയികളായി. സ്വാതന്ത്ര്യദിനവുമായി ബന്ധപ്പെട്ട് ഓൺലൈനായി സാമൂഹ്യ ശാസ്ത്ര ക്ലബ്ബിന്റെ നേതൃത്വത്തിൽ പതിപ്പ് നിർമ്മാണം, പ്രസംഗം, ചിത്രരചന, പ്രച്ഛന്നവേഷം, പ്രശ്നോത്തരി എന്നിവ നടത്തുകയുണ്ടായി. അന്നേദിവസം എല്ലാ കുട്ടികളും അദ്ധ്യാപകരും സ്വന്തം വീടുകളിൽ ദീപം തെളിയിച്ച് സ്വാതന്ത്ര്യജ്വാലയിൽ പങ്കാളികളായി.

സ്വാന്തന്ത്ര്യദിനം 2021-22 ചിത്രങ്ങൾ

വയോജന പീഢനവിരുദ്ധ ദിനം

2021 – ഒക്ടോബർ – 1

പ്രശസ്ത മജീഷ്യനായ ഉമ്മൻ ജെ മേദാരം മാജിക് അവതരണത്തിലൂടെ വൃദ്ധരായ മാതാപിതാക്കളെ സംരക്ഷിക്കേണ്ടതിന്റെ പ്രാധാന്യത്തെക്കുറിച്ച് കുട്ടികൾക്ക് ബോധവൽക്കരണ ക്ലാസ് നൽകി. തുടർന്ന് കുട്ടികൾ അവരുടെ മുത്തച്ഛന്റെയും മുത്തശ്ശിയോടൊപ്പമുള്ള ചിത്രങ്ങൾ പങ്കുവെച്ചുകൊണ്ട് അവരോടുള്ള സ്നേഹവും കരുതലും പ്രകടമാക്കി.

ഗാന്ധിജയന്തി

2021 – ഒക്ടോബർ – 2

നമ്മുടെ രാഷ്ട്രപിതാവായ മഹാത്മാ ഗാന്ധിയുടെ ജന്മദിനമാണ് ഗാന്ധിജയന്തിയായി ആചരിക്കുന്നത്. ഐക്യരാഷ്ട്രസഭ ഇതേ ദിവസം അന്താരാഷ്ട്ര അഹിംസാദിനമായി ആചരിക്കുന്നു. നമ്മുടെ വിദ്യാലയത്തിൽ ഗാന്ധിജയന്തിയോറനുബന്ധിച്ച് ഗാന്ധിമാർഗ പ്രവർത്തകനായ ശ്രീ സുധീർ വിദ്യാർഥികളോട് ഓൺലൈനിലൂടെ സംവദിച്ചു. ഗാന്ധിജിയുടെ ജനനം മുതൽ മരണം വരെയുള്ള സംഭവങ്ങൾ അദ്ദേഹം വിവരിച്ചു. തുടർന്ന് വിദ്യാർഥികളോട് ഗാന്ധിജിയെപ്പറ്റിയുള്ള ചോദ്യങ്ങൾ ചോദിച്ചു ശരിയുത്തരം പറഞ്ഞവർക്ക് സമ്മാനമായി ഗാന്ധിജിയുടെ ആത്മകഥ പിന്നീട് വീടുകളിലെത്തിച്ചു കൊടുത്തു. ക്ലാസിന് ശേഷം വിദ്യാർഥികൾ ഗാന്ധിജയന്തിയോടനുബന്ധിച്ച് തയ്യാറാക്കിയ ഗാന്ധിപ്പതിപ്പ്, ഗാന്ധിചിത്രങ്ങൾ, പ്രച്ഛന്നവേഷത്തിന്റെ ചിത്രങ്ങൾ എന്നിവ സ്കൂളിന്റെ വാട്സാപ്പ് ഗ്രൂപ്പിലൂടെ പങ്കുവെച്ചു.

ഗാന്ധിജയന്തി 2021-22 ചിത്രങ്ങൾ

ഗണിത ക്ലബ്ബ്

ദേശീയ ഗണിത ദിനം

2021 – ഡിസംബർ – 22

1887-ൽ ജനിച്ച മഹാഗണിതജ്ഞനായ ശ്രീനിവാസ രാമാനുജന്റെ ജീവിതവും ജന്മദിനവും ആഘോഷിക്കുന്നതിനായി എല്ലാ വർഷവും ഡിസംബർ 22-ന് ദേശീയ ഗണിത ദിനം ആചരിക്കുന്നു. അന്നേദിവസം വിദ്യാർഥികൾ ശ്രീനിവാസ രാമാനുജന്റെ ചിത്രങ്ങൾ, ഗണിത കടംകഥകൾ, ഗണിത പസിലുകൾ,ഘന രൂപങ്ങൾ എന്നിവ നിർമ്മിച്ചു കൊണ്ടുവന്നു. ഉച്ചയ്ക്ക് യു. പി വിഭാഗത്തിന്റെ ഒരു ഗണിതക്വിസ് മത്സരം നടത്തി വിജയികളായവർക്ക് സമ്മാനങ്ങളും നൽകി.