സി.ജെ.എച്ച്.എസ്. എസ് ചെമ്മനാട്/പ്രവർത്തനങ്ങൾ
| സ്കൂൾ | സൗകര്യങ്ങൾ | പ്രവർത്തനങ്ങൾ | എച്ച്.എസ് | എച്ച്.എസ്.എസ്. | ചരിത്രം | അംഗീകാരം |
പ്രവേശനോത്സവം 2026
ചെമ്മനാട് : സി ജെ എച്ച് എസ് എസ് ചെമ്മനാടിൽ എട്ടാം ക്ലാസ്സിലേക്ക് പുതുതായി കടന്നു വന്ന അറുന്നൂറോളം വിദ്യാർത്ഥികളെ വരവേൽക്കുന്നതിനായുള്ള പ്രവേശനോത്സവം വിപുലമായ പരിപാടികളോടെ നടന്നു. ഉദുമ നിയോജകമണ്ഡലം എം എൽ എ. കെ നീലകണ്ഠൻ ഉദ്ഘാടനം ചെയ്തു. സ്കൂൾ മാനേജർ സി ടി അഹമ്മദലി അധ്യക്ഷത വഹിച്ചു. പഞ്ചായത്ത് പ്രസിഡന്റ് ആയിഷഅബൂബക്കർ, വാർഡ് മെമ്പർമാരായ സകീന നജീബ്, ഷാഹിദ മൻസൂർ, ജമാഅത്ത് ജനറൽ സെക്രട്ടറി ബദറുൽ മുനീർ, ട്രഷറർ മുഹമ്മദ് മുസ്തഫ സി എം, സെക്രട്ടറി മുഹമ്മദ് സാജു സി എച്ച്, സ്കൂൾ കൺവീനർ സി എച്ച് റഫീഖ്, പി ടി എ പ്രസിഡന്റ് ബി എച്ച് അബ്ദുൽ ഖാദർ, വൈസ് പ്രസിഡന്റ് ജലീൽ പാലോത്ത്, എം പി ടി എ പ്രസിഡന്റ് സാബിറ അൻവർ, പ്രിൻസിപ്പാൾ ജിജി തോമസ്, സ്റ്റാഫ് സെക്രട്ടറി സുജാത കെ അബ്ദുൽ സലീം പ്രസംഗിച്ചു. ഹെഡ്മാസ്റ്റർ വിജയൻ കെ ആമുഖ പ്രസംഗം നടത്തി. ഹയർ സെക്കണ്ടറി സ്റ്റാഫ് സെക്രട്ടറി ദീപ പി നന്ദി പറഞ്ഞു.
വിദ്യാഭ്യാസ മന്ത്രി എൻ ശംസുദ്ദീന്റെ പുതുയുഗ വിദ്യാലയ സന്ദേശം ഓൺലൈനിലൂടെ കേൾപ്പിച്ചു. പുതിയ അധ്യയന വർഷത്തിന് തുടക്കം കുറിച്ച് സ്കൂളിലേക്ക് കടന്നു വന്ന വിദ്യാർത്ഥികളെ മധുരംനൽകി വാദ്യമേളകളുടെ അകമ്പടിയോടെ സ്കൂളിലേക്ക് ആനയിച്ചു. എസ് പി സി, എൻ സി സി, ജെ ആർ സി, ലിറ്റിൽ കൈറ്റ്സ്, സ്കൗട്ട് & ഗെയ്ഡ്സ് വിദ്യാർത്ഥികൾ സ്വീകരിച്ചു. പ്രവേശനം നേടിയ വിദ്യാർത്ഥികളുടെ രക്ഷിതാക്കളും അധ്യാപകരും ചടങ്ങിൽ പങ്കെടുത്തു.
എസ്പിസി സീനിയർ കേഡറ്റ് തസ്നീം സുബൈദ സൈബർ സുരക്ഷാ പ്രതിജ്ഞയും സുനി ഫാത്തിമ ഓപ്പറേഷൻ തൂഫാന്റെ ഭാഗമായി ലഹരി വിരുദ്ധ പ്രതിജ്ഞയും ചൊല്ലിക്കൊടുത്തു. സ്കൂളിലെ മുഴുവൻ വിദ്യാർത്ഥികൾക്കും മാനേജ്മെന്റ് കമ്മിറ്റി തയ്യാറാക്കിയ മധുരമൂറുന്ന പായസം വിതരണം ചെയ്തു. എം എൽ എ ആയതിനു ശേഷം ആദ്യമായി സ്കൂളിലേക്ക് വന്ന എം എൽ എ യെ സ്കൂൾ മാനേജർ സി ടി അഹമ്മദ് അലി ബൊക്കെ നൽകി സ്വീകരിച്ചു. സ്കൂളിന്റെ വികസന പ്രവർത്തനങ്ങളിൽ നേതൃത്വം വഹിക്കുന്ന മാനേജ്മെന്റിനെയും പി ടി എ യെയും എം എൽ എ പ്രശംസിച്ച് എല്ലാ പിന്തുണകളും വാഗ്ദാനം ചെയ്താണ് എം എൽ എ യാത്ര പറഞ്ഞത്.
ഒരു തൈ നടാം നല്ല നാളേയ്ക്ക് വേണ്ടി
പരിസ്ഥിതി ദിനം വിപുലമായി ആഘോഷിച്ചു
ചെമ്മനാട്: സിജെഎച്ച്എസ്എസ് ചെമ്മനാടിൽ ലോക പരിസ്ഥിതി ദിനാചരണം വിപുലമായ പരിപാടികളോടെ സംഘടിപ്പിച്ചു. പരിസ്ഥിതി സംരക്ഷണത്തിന്റെ പ്രാധാന്യം വിദ്യാർത്ഥികളിൽ വളർത്തുന്നതിന്റെ ഭാഗമായി വിവിധ ബോധവത്കരണ പ്രവർത്തനങ്ങൾ നടന്നു.
പരിപാടിയുടെ ഭാഗമായി എൻ എസ് എസ്, എസ് പി സി, എക്കോ ക്ലബ് എന്നിവയുടെ നേതൃത്വത്തിൽ വിദ്യാർത്ഥികളും അധ്യാപകരും ചേർന്ന് വൃക്ഷത്തൈ നട്ടുപിടിപ്പിക്കുകയും പരിസ്ഥിതി സംരക്ഷണ പ്രതിജ്ഞ ഏറ്റുചൊല്ലുകയും ചെയ്തു. സ്കൂൾ എസ് പി സി യൂണിറ്റിന്റെ നേതൃത്വത്തിൽ നടന്ന പരിപാടിയിൽ വാർഡ് മെമ്പർ സകീന നജീബ് ഉദ്ഘാടനം ചെയ്തു. പി ടി എ പ്രസിഡന്റ് ബി എച്ച് അബ്ദുൽ ഖാദർ അധ്യക്ഷത വഹിച്ചു. വാർഡ് മെമ്പർ മിനി, ഹെഡ് മാസ്റ്റർ വിജയൻ കെ, സ്കൂൾ കൺവീനർ റഫീഖ് സി എച്ച്, ഡ്രിൽ ഇൻസ്ട്രക്ടർമാരായ ജോസഫ് എ എസ് ഐ, ദർശന, എസ് പി സി കേഡറ്റുകൾ നേതൃത്വം നൽകി. കമ്മ്യൂണിറ്റി പോലീസ് ഓഫീസർ അബ്ദുൽ സലീം സ്വാഗതവും കാവ്യ ടി സി നന്ദിയും പറഞ്ഞു.
എക്കോ ക്ലബ്ബിന്റെ നേതൃത്വത്തിൽ സ്കൂളിലെ മുഴുവൻ കുട്ടികളും പരിസ്ഥിതി ദിന പ്രതിജ്ഞ ചൊല്ലി. റിഫ്ന പ്രതിജ്ഞ ചൊല്ലിക്കൊടുത്തു. കോർഡിനേറ്റർ ആയിഷത് സന നേതൃത്വം നൽകി.
