ഭഗവതി വിലാസം ഹയർസെക്കൻഡറി സ്കൂൾ നായരമ്പലം/സ്കൗട്ട്&ഗൈഡ്സ്
ഭാരത് സ്കൗട്ട് & ഗൈഡ് യൂണിറ്റ്
നമ്മുടെ സ്കൂളിൽ സേവനതല്പരരായ ഒരു കൂട്ടം വിദ്യാർത്ഥികളുടെ കൂട്ടായ്മയാണ് സ്കൗട്ട് ആൻഡ് ഗൈഡ്സ്. സ്കൂളിലെ ഏതൊരു പരിപാടിയ്ക്കും ഇവർ മുന്നിലുണ്ടാകും. 2016-ൽ 70 ഓളം വിദ്യാർത്ഥികളുമായി ആരംഭിച്ച പ്രസ്ഥാനം ഒട്ടേറെ മാതൃകാപരമായ പ്രവർത്തനങ്ങൾ നടത്തുകയുണ്ടായി. പിന്നീട് 2018ൽ സ്കൗട്ട് & ഗൈഡ് രണ്ടു യൂണിറ്റ് വീതമായി വിപുലീകരിക്കുകയും നൂറോളം വിദ്യാർത്ഥികൾ യൂണിറ്റിൽ പ്രവർത്തിക്കുകയും ചെയ്യുന്നു. 2019ൽ സ്കൗട്ട് & ഗൈഡ് യൂണിറ്റിന്റെ അഭിമാന നിമിഷങ്ങൾ എന്നോണം പത്തോളം ഗൈഡ്സ് കുട്ടികൾക്ക് രാജ്യപുരസ്കാർ അവാർഡിന് അർഹരായി. സ്കൂളിൽ നടപ്പിലാക്കിയ പച്ചക്കറിത്തോട്ട പരിപാലനം, രക്ത ദാന ക്യാമ്പ് , നിർദ്ധനർക്കായുള്ള ഓണകിറ്റ് വിതരണം, ലഹരിവിരുദ്ധദിനത്തോടനുബന്ധിച്ചു നടത്തിയ തെരുവുനാടകം, സൈക്കിൾ റാലി, വൃക്ഷ തൈവിതരണം എന്നിവ യൂണിറ്റിന്റെ ആഭിമുഖ്യത്തിൽ നടത്തിയ പ്രവർത്തനങ്ങൾ ആണ്. 2018ലെ പ്രളയത്തിൽ ചേന്ദമംഗലം കൈത്തറിയ്ക്കൊരു കൈസഹായവുമായി ചെകൂട്ടി നിർമ്മാണം സ്കൂളിലെ സ്കൗട്ട് & ഗൈഡ് യൂണിറ്റ് ഏറ്റെടടുത്തു. ഏകദേശം ആയിരത്തോളം പാവകളെ നിർമ്മിച്ചു നൽകി. 2019ൽ പ്രളയത്തിന് കോഴിക്കോട് പ്രളയം ബാധിച്ച വേങ്ങേരി നിവാസികൾക്ക്‌ സഹായഹസ്തവുമായി സ്കൗട്ട് & ഗൈഡ് യൂണിറ്റ് കുട്ടികൾ "അതിജീവനത്തിനായി സ്നേഹപൂർവ്വം " എന്ന പദ്ധതി രൂപപ്പെടുത്തി ഏകദേശം 1200കിലോ സാധസാമഗ്രികൾ ശേഖരിച്ചു നൽകി. പരിസ്ഥിതി സംരക്ഷണത്തിനും സ്കൂളിൽ ഗ്രീൻ പ്രോട്ടോകോൾ ഉറപ്പാക്കുന്നതിനും ഹരിതസേന എന്നൊരു വിഭാഗവും ഇതിനു കീഴിൽ പ്രവർത്തിക്കുന്നുണ്ട്. സ്കൂളിന്റെ അച്ചടക്കത്തിലും ശുചിത്വത്തിലും നിതാന്ത ജാഗ്രത പുലർത്തുന്ന ഈ മിടുക്കന്മാരും മിടുക്കികളും മറ്റു വിദ്യാർത്ഥികൾക്ക് ഒരു മാതൃകയാണ്. ജില്ല ഉപജില്ലാ തലത്തിൽ നടക്കുന്ന ക്യാമ്പുകളിൽ നമ്മുടെ സ്കൗട്ട് & ഗൈഡ് വിദ്യാർത്ഥികൾ പങ്കെടുക്കുകയും മികച്ച പ്രകടനം നടത്തുകയും ചെയ്യാറുണ്ട്. സ്കൂളിന്റെ നെടും തൂണായി സ്കൗട്ട് & ഗൈഡ് പ്രസഥാനം മാറിയതിൽ അധ്യാപകരുടെ പങ്ക് പ്രശംസനീയമാണ്. കുട്ടികളുടെ വ്യക്തിത്വ വികസനത്തിനും സ്വഭാവരൂപീകരണത്തിനും ഈ പ്രസഥാനം വഹിക്കുന്ന പങ്ക് വളരെ വലുതാണ്.
