ബി ജെ എസ് എം വി എച്ച് എസ് എസ് മഠത്തിൽ/എന്റെ ഗ്രാമം

തഴവ

കൊല്ലം ജില്ലയിലെ കരുനാഗപ്പള്ളി താലൂക്കിലെ, തഴപ്പായ നിർമാണം കൊണ്ട് പ്രസിദ്ധമായ ഗ്രാമമാണ് തഴവ.

തഴവ, പാവുമ്പ എന്നീ രണ്ടു ഗ്രാമങ്ങൾ ഒന്നിച്ച് ചേർന്ന പഞ്ചായത്താണ് തഴവാ പഞ്ചായത്ത്. തഴപ്പായ വ്യവസായ കേന്ദ്രമായി ഖ്യാതി നേടിയ തഴവ ഇപ്പോൾ നിരവധി വിനോദസഞ്ചാരികളെ ആകർഷിക്കുന്നു .തഴപ്പായ വ്യവസായത്തിൽ നിന്നുമാണ് തഴവ എന്ന സ്ഥലനാമം കൈവന്നത് എന്ന് കരുതപ്പെടുന്നു.2011ലെ സെൻസസ്പ്രെകാരം ഇവിടുത്തെ ജനസംഖ്യ 23,341 ആണ്. ഇതിൽ 10,818 പുരുഷന്മാരും 12523 സ്ത്രീകളും ഉൾപ്പെടുന്നു. ഈ ഗ്രാമത്തിൽ 93.8% എന്ന ഉയർന്ന സാക്ഷരതാ നിരക്കുണ്ട്.കൃഷിയും മൃഗപരിപാലനവുമാണ് ജനങ്ങളുടെ പ്രധാന തൊഴിൽ. നെല്ലും നാളികേരവുമാണ് പ്രധാന കൃഷി.

പണ്ട് തഴ കൊണ്ട് പായയും വട്ടിയും മറ്റ് കരകൗശല വസ്തുക്കളും നിർമിച്ചു ഉപജീവനം കാണുന്നവർ ആയിരുന്നു ഈ പഞ്ചായത്തിലെ ഏറെ ആളുകൾ. പെൺ തഴ കൊണ്ട് നെയ്യുന്നത് ആണ് മെത്തപ്പായ. അരിപ്പായയും ചിക്കുപായയും നെയ്യാനാണ് ആൺ തഴ. ഇവിടെ പലരും തഴ അല്ലെങ്കിൽ സ്ക്രൂ പൈൻ അടിസ്ഥാനമാക്കിയുള്ള ഉപജീവനമാർഗ്ഗം തേടുന്നു. തഴവയിൽ പ്രചാരത്തിലുള്ള ഏറ്റവും പഴക്കം ചെന്ന കരകൗശല വസ്തുക്കളിൽ ഒന്നാണ് തഴ കൊണ്ടുള്ള തഴ പായ നെയ്ത്ത്. മുൻകാലങ്ങളെ അപേക്ഷിച്ച് ഇപ്പോൾ തഴ പായ നെയ്ത്ത് താരതമ്യേന കുറഞ്ഞിട്ടുണ്ടെങ്കിലും, ഈ തൊഴിൽ ഇപ്പോഴും തുടരുന്ന പരമ്പരാഗത നെയ്ത്തുകാർ ചുരുക്കമാണ്. ഇന്ത്യയ്ക്കകത്തും പുറത്തും പായകൾ ഇപ്പോൾ കയറ്റുമതി ചെയ്യുന്നുണ്ട്.

പുരാതന കാലത്ത്, തഴ പായ നെയ്തെടുത്ത് തിരുവിതാംകൂർ പ്രവിശ്യ ഉൾപ്പെടെ കേരളത്തിലെ വിവിധ പ്രവിശ്യകളിലേക്ക് മൊത്തത്തിൽ വിതരണം ചെയ്തിരുന്നു.

തഴ - കൈത (സ്ക്രൂ പൈൻ)

നല്ല വെള്ളമുള്ള സ്ഥലങ്ങളിലും അപൂർവ്വം ചില മലകളിലും വളരുന്ന സുഗന്ധമുള്ള പൂക്കളുണ്ടാവുന്നതും മുള്ളുകളോടുകൂടിയ ഇലകളുമുള്ള സസ്യമാണ്‌ കൈത. ശാസ്ത്രീയനാമം Pandanus Canaranus. പൂക്കൈത എന്നും തഴ എന്നും വിളിക്കുന്നു. വയലുകളും കായലുകളും ധാരാളം വെള്ളവുമുള്ള സ്ഥലങ്ങളിലാണ്‌ ഇത് കണ്ടുവരുന്നത്. എന്നാൽ കടലിനോട് ചേർന്ന പ്രദേശങ്ങളിലും ഇടുക്കി ജില്ലയിലെ മഞ്ഞുമൂടിയ പ്രദേശങ്ങളിലും ഇവയുടെ സാന്നിദ്ധ്യമുണ്ട്. ദക്ഷിണേന്ത്യയിൽ കേരളത്തിലും കർണ്ണാടകത്തിലും ഇവ കണ്ടുവരുന്നു. ഇതിന്റെ ഇലകളുണക്കിയാണ് പായ നെയ്യുന്നത്. കൊട്ട, കയർ തുടങ്ങിയവയുണ്ടാക്കാനുമുപയോഗിക്കുന്നു. വേരുപയോഗിച്ച് വെള്ളപൂശാനുള്ള ബ്രഷുണ്ടാക്കാറുണ്ട്. പൂക്കൾ ഹൃദയഹാരിയായ അതിസുഗന്ധമുള്ളവയാണ്‌. 12 വർഷത്തിലൊരിക്കലേ കൈതപൂക്കാറുള്ളു. കേരളത്തിൽ താഴമ്പൂ എന്നും ചിലയിടങ്ങളിൽ കൈനാറിപ്പൂവ് എന്നും ഇതിന്നു പേരുണ്ട്. സ്ത്രീകൾ പണ്ട് കാലത്ത് മുടിയിൽ ചൂടിയിരുന്നു. വസ്ത്രങ്ങൾ സൂക്ഷിക്കുന്ന പെട്ടികളിൽ സുഗന്ധവസ്തുവായി ഇതുപയോഗിച്ചിരുന്നു. പെട്ടികളിൽ ഇതിന്റെ ഗന്ധം ദീർഘകാലം നിലനിൽക്കും. കൈതപ്പൂവിനെപ്പറ്റി പുരാണങ്ങളിൽ പരാമർശമുണ്ട്. ചില അറബി നാടുകളിൽ കൈതപ്പൂവ് വിൽക്കുന്നത് കാണാൻ കഴിയും സൗദിയിലെ ഉൾഗ്രാമങ്ങളിൽ വിവാഹം പോലുള്ള വിശേഷ ദിവസങ്ങളിൽ സ്ത്രീ പുരുഷ ഭേദമന്യേ ഉപയോഗിച്ചു വരുന്നു അർശസ്സിനുള്ള മരുന്നായും കൈത ഉപയോഗിക്കപ്പെടുന്നു. കൈതച്ചക്കയോട് സാമ്യമുള്ള കായ്കൾ ഇതിൽ ഉണ്ടാകുമെങ്കിലും അവയ്ക്ക് ഉപയോഗമുള്ളതായി കേട്ടിട്ടില്ല.എന്നാൽ Screw Pine വിഭാഗത്തിൽ ലോകത്താകമാനം 750 ൽ ഏറെ ഇനങ്ങൾ ഉളളതിൽ ചിലതിന്റെ കായ് പാകം ചെയ്ത് ഉപയോഗിക്കാമെന്നും കേൾക്കുന്നു. വംശവർദ്ധന - തണ്ട് മുറിച്ചു നട്ട് പുതിയ ചെടി വളർത്താം.

സമ്പൽസമൃദ്ധമായ തഴവ

തഴവാ, പാവുമ്പ എന്നീ വില്ലേജുകൾ ചേർന്നതും 23.58 ച.കി.മീ. വിസ്തൃതവും സ്നേഹത്തിൻ കൊടുംകാറ്റുകൾ സദാ വീശുന്നതും കൊല്ലം ജില്ലയിൽ ഏറ്റവും കൂടുതൽ നെല്ലുല്പാദിപ്പിക്കുന്നതും സമ്പൽസമൃദ്ധവുമായ ഗ്രാമമാണ് തഴവ. മെത്തപ്പായി നിർമ്മിക്കുന്നതിനാവശ്യമായ പെൺകൈത സമൃദ്ധമായി വളരുന്നതുകൊണ്ടാകാം ഈ സ്ഥലത്തിനു തഴവയെന്നപേരു വന്നതെന്ന് ഊഹിക്കാം.കുതിരപ്പന്തി ചന്ത വളരെ പ്രസിദ്ധമാണ് .തഴപ്പാ നെയ്ത് കച്ചവടം ചെയ്ത് വരുമാനും കണ്ടെത്തുമായിരുന്നു ഇവിടുത്തെ ജനങ്ങൾ.

ഈ പ്രദേശം രൂപപ്പെടുത്തിയ പ്രിയങ്കരവുമായ മെത്തപ്പായ കടന്നു ചെല്ലാത്ത ഏറെ ലോകത്തിന്റെ ഒരു സ്ഥലം പോലുമില്ല. ഇവിടുത്തെ സ്ത്രീകൾ നെയ്‌തുണ്ടാകുന്ന പായകളുടെ ആദ്യരൂപം അടിപ്പായും മേൽപ്പായും പഞ്ചായത്തിലെ എല്ലാ അന്തിച്ചന്തകളിലും വിറ്റു മാറുക പതിവായിരുന്നു. എന്നാൽ ഇവകൾകൂട്ടി ഇണക്കി നിറം പിടിപ്പിച്ച് തഴക കൊണ്ട് അരികുകൾ തുന്നി നിർമ്മിച്ച മനോഹരമായ മെത്തപ്പായകൾ വിൽക്കുന്ന ഏക സ്ഥലം ഒന്നാം വാർഡിലെ കുതിരപന്തി ചന്ത മാത്രമാണ്. തിങ്കൾ, വ്യാഴം എന്നീ ദിവസങ്ങളിലെ പ്രഭാതങ്ങളിൽ സംസ്ഥാനത്തിന്റെ വിവിധ ഭാഗങ്ങളിൽ നിന്നും എത്തുന്ന വ്യവസായികൾ ഈ പായകൾ വാങ്ങുന്നു. എല്ലാ ആഴ്‌ചകളിലും ഈ ദിവസങ്ങളിൽ മെത്തപ്പായുടെ വലിയ കെട്ടുകൾ ഇവിടെ നിന്നും വിവിധ ദിശകളിലേക്ക് നീങ്ങുമ്പോൾ വടക്കുംമുറി കിഴക്ക് പ്രവർത്തിച്ചിരുന്ന 2062-ാം നമ്പർ സഹകരണസംഘം കേരളത്തിൻ്റെ മൊത്തം ശ്രദ്ധയും പറ്റിയിരുന്നു. അതൊക്കെ ഇന്ന് ഓർമ്മകളിൽ മാത്രം. പ്രസ്‌തുത സ്ഥലത്ത് ഇന്ന് പ്രവർത്തനം നടത്തുന്നത്. ഗാന്ധി സ്മ‌ാരകനിധി കേന്ദ്രമാണ്.

തിരുവിതാംകൂർ രാജകുടുംബത്തിൻ്റെ ഉഗ്രപ്രതാപകാലത്ത് ഇവിടത്തെ 'മെത്തപ്പായ്' കൊട്ടാരത്തിൽ എത്തിച്ച തൊഴിലാളിയായിരുന്നു വെളുമ്പി. നൂല് വണ്ണത്തിൽ കൈതച്ചെടിയുടെ ഇല അറുത്ത് നാരാക്കി അതുകൊണ്ട് മെനഞ്ഞ മെത്തപ്പായ് ഒരു മുളക്കുഴലിൽ ആക്കി വെളുമ്പി തിരുവിതാംകൂർ മഹാരാജാവിന് കാഴ്‌ച വെച്ചു. തിരുമനസിന് മെത്തപ്പായ് ഏറെ ഇഷ്‌ടപ്പെട്ടു. ചെങ്കോലും കീരിടവും കാഴ്ചബംഗ്ളാവിൽ സ്ഥാനം പിടിച്ചു കഴിഞ്ഞപ്പോൾ ഇന്ത്യയുടെ പ്രധാനമന്ത്രിയായിരുന്ന പണ്ഡിറ്റ് ജവഹർലാൽ നെഹ്റുവിന് ഇതേ തരത്തിലുള്ള ഒരു മെത്തപ്പായ് കരുനാഗപ്പള്ളിയിൽ വച്ച് നൽകി.

ഈ പഞ്ചായത്തിൽ രൂപം കൊണ്ട പാവുമ്പം വില്ലേജ് പണ്ട് കാലത്ത് 'പാമ്പുംവാ' എന്നാണ് വിളിച്ചിരുന്നതെന്ന് പഴമക്കാർ പറയുന്നു. അത് ലോപിച്ചുലോപിച്ചാണത്രേ പാവുമ്പാ ആയത്. പണ്ട് കുറ്റവാളികളെ കണ്ടെത്തുന്നതിനുള്ള മാർഗ്ഗം സത്യം ചെയ്യിക്കലായിരുന്നു. ഇന്നത്തെ കോടതികളുടെ സ്ഥാനം ക്ഷേത്രങ്ങൾക്കായിരുന്നു. നാടുവാഴികളും പ്രഭുക്കളും ഈ കുറ്റവിചാരണ പാവുമ്പയിൽ നടത്തിയിട്ടുണ്ടെന്നതിനു തെളിവുകൾ ഇപ്പോഴും നിലനിൽക്കുന്നു. ക്ഷേത്രത്തിന്റെ വടക്കേ മണ്ഡപത്തിൻ്റെ അടിവശത്തായി ഒരാളിന്റെ ചുരുട്ടിയ കൈ കയറ്റാവുന്ന ഒരു ദ്വാരം ഇന്നും കാണാം. കുറ്റവാളി എന്നു സംശയിക്കുന്ന ആളിൻ്റെ കൈചുരുട്ടി ഈ ദ്വാരത്തിലാക്കുന്നു. ആൾ കുറ്റക്കാരനാണെങ്കിൽ മണ്ഡപത്തിന്റെ അടിയിൽ സ്ഥിര താമസക്കാരനായ സർപ്പം കയ്യിൽ കൊത്തിയത് തന്നെ. നിരപരാധിയെങ്കിൽ നാഗം ചലിക്കില്ല എന്നാണ് വിശ്വാസം. ഇവിടെ നടന്നിരുന്ന ഈ കുറ്റവിചാരണ ഏറെ പ്രസിദ്ധി നേടിയിരുന്നു. അതുകൊണ്ട് തന്നെ 'പാമ്പുവായും' പ്രസിദ്ധമായി. ഒരു നാലമ്പലത്തിനുള്ളിൽ ശിവനും, വിഷ്‌ണുവും ഒരേസമയം പൂജിക്കപ്പെടുക എന്നത് വളരെ അപൂർവ്വമാണ്. ഈ അപൂർവ്വത ഏഴുനൂറ്റാണ്ടിനകം പഴക്കമുള്ള പാവുമ്പക്ഷേത്രത്തിനുണ്ട് എന്നുള്ളത് ഇവിടത്തെ പ്രത്യേകതകളിൽ സവിശേഷത അർഹിക്കുന്നതാണ്. പ്രാചീനവും പ്രാധാന്യവും ഉള്ളതുമായ മറ്റൊരു ആരാധനാലയമാണ് 'കൊച്ചുഗുരുവായൂർ' എന്നറിയപ്പെടുന്ന തഴവ ശ്രീകൃഷ്‌ണസ്വാമി ക്ഷേത്രം.ഇവിടുത്തെ ശംഖ്, ചക്രം, ഗദ, വിഷ്ണുവിനെ ചന്ദനത്തിൽ പൊതിയുന്ന മുഴുക്കാപ്പ് പ്രസിദ്ധമാണ്.

കലാരംഗത്തും തങ്ങളുടെ വ്യക്‌തി മുദ്രകൾ പതിപ്പിച്ചിട്ടുളളതും വളരെയധികം പൊതുസ്ഥാപനങ്ങൾ ഉള്ളതുമായ ഈ ഗ്രാമം ഉയർച്ചയുടെ പടവുകൾ കൈയ്യടക്കുമെന്നത് അഭിമാനാർഹമായ കാര്യം തന്നെയാണ് .

കൈതോലയിൽ ചന്തം വിരിയും തഴവ

കൈതപ്പൂവിൻ കന്നിക്കുറുമ്പിൽ തൊട്ടു തൊട്ടീല, കന്നി നിലാവത്ത് കസ്തൂരി പൂക്കുന്നു കൈതേ കൈതേ കൈനാറി, താഴമ്പൂ മണക്കുന്ന തണുപ്പുള്ള രാത്രിയിൽ... താഴമ്പൂ എന്നും കൈനാറി എന്നുമൊക്കെ അറിയപ്പെടുന്ന കൈതപ്പൂവിനെ പാടിപുകഴ്ത്തുന്ന ഗാനങ്ങൾ ഒട്ടേറെ. എങ്കിലും കൈത ഒരു ഗ്രാമത്തെ ഒട്ടാകെ പ്രശസ്തിയിലേക്കെത്തിച്ചത് ഏറെ വാസനയുള്ള, പൂജയ്ക്ക് എടുക്കാത്ത ഈ പൂവിന്റെ പേരിലല്ല. തൊട്ടാൽ കൈ മുറിയുന്ന മുള്ളുകളുള്ള കൈതയിൽ പിന്നെന്തു ചന്തം വിടരാൻ? ചന്തം മാത്രമല്ല, സുഖകരമായ നിദ്രയ്ക്കും കാലങ്ങളോളം മലയാളികൾ ആശ്രയിച്ചത് ഈ ചെടിയെ ആയിരുന്നു.

പേരിലും കൈത

തഴപ്പായകളുടെ നിർമാണംകൊണ്ട് പേരിൽപ്പോലും ‘തഴ’ കയറിപ്പറ്റിയ കൊല്ലം ജില്ലയിലെ തഴവ ഗ്രാമമാണ് മുൾച്ചെടിയുടെ ഇലയെ വിരിച്ചിരിക്കാനും കിടക്കാനും പാകത്തിൽ പരുവപ്പെടുത്തി താഴമ്പൂവിന്റെ വാസനയെക്കാൾ പ്രശസ്തമായത്. വിട്ടൊഴിയാത്ത ഗ്രാമഭംഗിയും കൈതോലയിൽ നെയ്തെടുക്കുന്ന കരകൗശലങ്ങളുടെ മാറ്റും ഇവിടേക്ക് സഞ്ചാരികളെ ആകർഷിക്കുന്നു.തഴപ്പായ നെയ്തു പ്രസിദ്ധമായതിനാലാണ് തഴവ എന്ന് പേരുവന്നത് എന്ന് കരുതാം .

കുതിരപ്പന്തി

കൊല്ലം ജില്ലയിൽ കരുനാഗപ്പള്ളി താലൂക്കിലെ ഒരു പ്രദേശം ആണ് കുതിരപ്പന്തി. തഴവഗ്രാമപഞ്ചായത്തിലെ തഴവഗ്രാമത്തിൽപെട്ട ഈ പ്രദേശത്തെ ആഴ്ചചന്ത മുൻപ് ഓണാട്ടുകരയിലെ ഏറ്റവും വലിയ കാർഷികവിഭവങ്ങളുടെ വിപണനകേന്ദ്രമായിരുന്നു.ബി.ജെ.എസ്സ്.എം.മഠത്തിൽ വി & എച്ച്.എസ്സ്.എസ്സ്, ഗവണ്മെന്റ് എൽ.പി.എസ്സ്.,കുതിരപ്പന്തി തുടങ്ങിയ വിദ്യാഭ്യാസസ്ഥാപനങ്ങൾ ഇവിടെയാണു പ്രവർത്തിക്കുന്നത്.

പണ്ട്കാലങ്ങളിൽ കുതിരകളെ വ്യാപാരം ചെയ്തിരുന്ന സ്ഥലമായിരുന്നത് കൊണ്ടാണു ഗ്രാമത്തിന് കുതിരപ്പന്തി എന്നു പേരുലഭിച്ചത് എന്ന് പറയപ്പെടുന്നു

ഭൂമിശാസ്ത്രം

പഞ്ചായത്തിന്റെ അതിരുകൾ വടക്ക് ഓച്ചിറ, ആലപ്പുഴ ജില്ലയിലെ വള്ളിക്കുന്നം, താമരക്കുളം പഞ്ചായത്തുകളും, തെക്ക് തൊടിയൂർ പഞ്ചായത്തും, കിഴക്ക് ശൂരനാട് വടക്ക് പഞ്ചായത്തും, പടിഞ്ഞാറ് കുലശേഖരപുരം പഞ്ചായത്തുമാണ്.

പ്രധാന പൊതു സ്ഥാപനങ്ങൾ

ആതുര ശിശ്രുഷ രംഗത്ത് പൊതുമേഖലയിലും സ്വകര്യ മേഖലയിലും നിരവധി സ്ഥാപനങ്ങൾ ഇവിടെ പ്രവർത്തിക്കുന്നു. എഫ് എച് സി തഴവ, ഗവ. ആയുർവേദ ഹോമിയോ ആശുപത്രികളും പൊതുമേഖലയിൽ പ്രവർത്തിക്കുന്ന ആതുര ശിശ്രുഷ കേന്ദ്രങ്ങളാണ്.

കൃഷിഭവൻ കൃഷിയുടെ വളർച്ചക്കും വികസനത്തിനും കർഷകക്ഷേമത്തിനും ആവശ്യമായ സേവനങ്ങൾ നൽകുന്നു.ഗ്രന്ഥശാല ,കുതിരപ്പന്തി

ഗതാഗതമാർഗങ്ങൾ

പുതിയകാവ് -ചക്കുവള്ളി റോഡും വവ്വാക്കാവ് മണപ്പള്ളി റോഡും ചങ്ങൻകുളങ്ങര വള്ളികുന്നം റോഡും ഈ പഞ്ചായത്തിലെ പ്രാധാന റോഡുകളാണ്. അടുത്തുള്ള റെയിൽവേ സ്റ്റേഷൻ കരുനാഗപ്പള്ളി റെയിൽവേ സ്റ്റേഷൻ ആണ്.തിരുവനന്തപുരം ഇന്റർനാഷണൽ എയർപോർട്ട് ആണ് അടുത്തുള്ള വിമാനത്താവളം

കലാസാംസ്കാരികരംഗം

ശ്രീ മഹാദേവദേശായി ഗ്രന്ഥശാല

സംഭരംഭകത്വങ്ങൾ

ഖാദി ഗ്രാമവ്യവസായ കേന്ദ്രം, മണപ്പള്ളി

ശ്രദ്ധേയരായ വ്യക്തികൾ

ശ്രീമൂലം പ്രജാസഭാംഗമായിരുന്ന ശാരദാലയം പദ്മനാഭൻ.
സ്വാതന്ത്യ്രസമരസേനാനിയും ശ്രീനാരായണഗുരുവിന്റെ ശിഷ്യനുമായ കോട്ടു കോയിക്കൽ കെ.എം. വേലായുധൻ.

പിന്നോക്ക വിഭാഗങ്ങളുടെ നേതാവും രാജ്യസഭാംഗവുമായിരുന്ന തഴവകേശവൻ.

പ്രമുഖ സ്വാതന്ത്ര സമര സേനാനിയും കോൺഗ്രസ്സ്നേതാവുമായിരുന്ന കൈതവനത്തറ രാഘവൻപിള്ള
ശ്രീ മഠത്തിൽ വാസുദേവൻ പിളള:സ്കൂൾ ആരംഭിക്കുകയും നിരവധി തലമുറകൾക്ക് വിദ്യാഭ്യാസം നൽകുകയും ചെയ്തു
മതപണ്ഡിതനായിരുന്ന തഴവ മുഹമ്മദ്കുഞ്ഞ് മൗലവി (തഴവ ഉസ്താദ്)
യുവകലാസാഹിതിസംസ്ഥാന നേതാവായിരുന്ന പി.ആർ.കർമ്മചന്ദ്രൻ
മുൻ കേരള നിയമസഭഅംഗവും മുൻ ഖാദി ബോർഡ് ചെയർമാനുമായിരുന്ന ഉണ്ണികൃഷ്ണപിള്ള
ഡി.വൈ.എഫ്.ഐമുൻ അഖിലേന്ത്യാ നേതാവും മുൻ സംസ്ഥാന അധ്യക്ഷനുമായിരുന്ന പി.ആർ. വസന്തൻ
എ.ഐ.സി.സി അംഗവും കരുനാഗപ്പള്ളി എം.എൽ.എ യുമായ സി.ആർ. മഹേഷ്
കെ.പി.സി.സി ജന.സെക്രട്ടറി കെ.സി.രാജൻ
ബി.ഡി.ജെ.എസ് സംസ്ഥാന നേതാവും പ്രമുഖ നാടകപ്രവർത്തകനുമായ തഴവ സഹദേവൻ
ഗായിക ചിത്ര അയ്യർ
കഥാപ്രസംഗകാരൻ തഴവ കെ.പി.ഗോപാലൻ
കൃഷി ശാസ്ത്രഞ്ജരായ വെങ്ങാട്ടംമ്പള്ളി മഠത്തിൽ ആർ.ഡി.അയ്യർ, രോഹിണി അയ്യർ
ഐ.എൻ.ടി.യു.സി.നേതാവും ഖാദി ബോർഡ് ജോ.സെക്രട്ടറിയുമായിരുന്ന കൈതവനത്തറ ശങ്കരൻകുട്ടി

ആരാധനാലയങ്ങൾ

തഴവാ ശ്രീകൃഷ്ണസ്വാമി ക്ഷേത്രം

താഴവയിൽ സ്ഥിതി ചെയ്‌യുന്ന പ്രാചീനമായ ക്ഷേത്രമാണ് തഴവ ശ്രീ കൃഷ്ണ സ്വാമി ക്ഷേത്രം. കൊച്ചു ഗുരുവായൂർ എന്നും ഈ ക്ഷേത്രത്തെ അറിയപ്പെടുന്നു. ഇവിടുത്തെ ചക്രം, ഗദ, ശംഖ്, പദമധാരിയായ വിഷ്ണുവിനെ ചന്ദനത്തിൽ പൊതിയുന്ന മഴുക്കാപ്പ് എന്നിവ പ്രസിദ്ധം.

ഉത്സവങ്ങൾ

ക്ഷേത്രത്തിൽ നിരവധി ഉത്സവങ്ങളുണ്ട്. പ്രധാനപ്പെട്ടവ ഇവയാണ്:

തിരു ആറാട്ടു മഹോൽസവം

മലയാള മാസമായ കുംഭത്തിൽ ആഘോഷിക്കുന്ന തിരു ആറാട്ടു മഹോൽസവം തഴവ ശ്രീകൃഷ്ണ ക്ഷേത്രത്തിലെ ഒരു മഹത്തായ ഉത്സവമാണ്. വിപുലമായ ഘോഷയാത്രകൾ, പരമ്പരാഗത ആചാരങ്ങൾ, സാംസ്കാരിക പ്രകടനങ്ങൾ എന്നിവ ഈ ഊർജ്ജസ്വലമായ പരിപാടിയിൽ ഉൾപ്പെടുന്നു, ഇത് ധാരാളം ഭക്തരെ ആകർഷിക്കുന്നു. ശുദ്ധീകരണത്തിന്റെയും ദിവ്യാനുഗ്രഹത്തിന്റെയും പ്രതീകമായി ദേവന്റെ വിഗ്രഹത്തിന്റെ ആചാരപരമായ കുളിയാണ് ഹൈലൈറ്റ്.

ശ്രീ കൃഷ്ണ ജയന്തി

തഴവ ശ്രീ കൃഷ്ണ ക്ഷേത്രത്തിലെ ശ്രീ കൃഷ്ണ ജയന്തിയിൽ ശോഭയാത്ര എന്ന പേരിൽ ശ്രീകൃഷ്ണന്റെ വേഷം ധരിച്ച കുട്ടികളും അദ്ദേഹത്തിന്റെ ജീവിതത്തിലെ മറ്റ് കഥാപാത്രങ്ങളും പങ്കെടുക്കുന്ന ഒരു മഹത്തായ ഘോഷയാത്ര നടക്കുന്നു. പരമ്പരാഗത സംഗീതത്തിന്റെയും നൃത്തത്തിന്റെയും അകമ്പടിയോടെയുള്ള ഈ വർണ്ണാഭമായ പരേഡ്, ഭഗവാൻ കൃഷ്ണന്റെ ജനനം ആഘോഷിക്കുകയും പ്രത്യേക പ്രാർത്ഥനകളോടും ആഘോഷങ്ങളോടും കൂടി ക്ഷേത്രത്തിൽ സമാപിക്കുകയും ചെയ്യുന്നു.