നൊച്ചാട് എച്ച്. എസ്സ്.എസ്സ്./2020-2021 അധ്യയന വർഷത്തെ പ്രവർത്തനങ്ങൾ
എട്ടാം തരത്തിലേക്ക് അഡ്‍മിഷൻ തേടി വരുന്ന വിദ്യാർത്ഥികൾക്ക് ഏപ്രിൽ മെയ് മാസങ്ങളിൽ 'ദേശാടന പക്ഷികൾ' എന്ന വാട്സ്ആപ് ഗ്രൂപ്പിലൂടെ ഓൺലൈൻ ബ്രിഡ്ജ് കോഴ്‍സ് നടത്തി. വിവിധ ജില്ലകളിലുള്ള വിദ്യാർത്ഥികൾ ഇതിൽ പങ്കെടുക്കുകയും അവരുടെ രക്ഷിതാക്കൾ സ്‍കൂളിന്റെ പ്രവർത്തനത്തെ അംഗീകരിക്കുകയും ചെയ്‍തു. ആഴ്‍ചതോറും നടത്തിയ വിവിധ മത്സര ഇനങ്ങളിൽ നിന്നും വിജയികളെ കണ്ടെത്തി വീടുകളിൽ പോയി അഭിനന്ദിച്ചു.
കോവിഡ് 19 എന്ന ആഗോള മഹാമാരി കാരണം സ്‍കൂൾ തുറന്നു പ്രവർത്തിക്കാൻ സാധിക്കാത്തതിനാൽ ക്ലാസ്‍സ് ഗ്രൂപ്പുകൾ സൃഷ്ടിച്ച് ഓൺലൈൻ പഠന പ്രവർത്തനങ്ങൾ നടന്നു. കൈറ്റ് വിക്ടേഴ്‍സ് ചാനൽ സംപ്രേഷണം ചെയ്‍ത ക്ലാസ്‍സുകൾ അദ്ധ്യാപകരും വിദ്യാർത്ഥികളും കണ്ട ശേഷം ക്ലാസ്‍സ് ഗ്രൂപ്പുകളിൽ വൈകീട്ട് 06.30 മുതൽ 09.30 വരെ ചർച്ച ചെയ്‍തു. രാവിലെ അഞ്ചു മണി മുതൽ ഏഴു മണി വരെ പത്താം തരം ക്ലാസ്‍സ് ഗ്രൂപ്പുകളിൽ അദ്ധ്യാപകരുടെ മേൽ നോട്ടത്തിൽ, വിദ്യാർത്ഥികളുടെ നേതൃത്വത്തിൽ പഠന പ്രവർത്തനങ്ങൾ നടന്നു. വിവിധ ദിനാചരണങ്ങൾ ഓൺ ലൈനിലൂടെ ക്ലാസ്‍സ് ഗ്രൂപ്പുകളിൽ നടത്തി. പരിസ്ഥിതി ദിനം, ബഷീർ അനുസ്‍മരണ ദിനം, ചാന്ദ്ര ദിനം, വായനാ ദിനം, ഹിരോഷിമ ദിനം, കലാം ദിനം, സ്വാതന്ത്ര്യ ദിനം എന്നിവയോടനുബന്ധിച്ച് ചിത്രരചന, പ്രശ്‍നോത്തരി, പ്രസംഗം, വീഡിയോ പ്രസന്റേഷൻ എന്നിവയിൽ മത്സരങ്ങൾ നടത്തി വിജയികളെ കണ്ടെത്തുകയും അവരെ ഓൺലൈനായും വീടുകളിലെത്തിയും അഭിനന്ദിക്കുകയും ചെയ്‍തു. ഓണാഘോഷം ഡിജിറ്റൽ പൂക്കളമുൾപ്പെടെയുള്ള വിവിധ പരിപാടികളോടെ ഓൺലൈനായി ആഘോഷിച്ചു. 2021 ജനുവരി ഒന്നുമുതൽ പത്താം തരം വിദ്യാർത്ഥികൾക്ക് മാത്രമായി സ്‍കൂൾ തുറന്നു പ്രവർത്തിച്ചു. ചിട്ടയായ ഓൺലൈൻ-ഓഫ് ലൈൻ പഠന പ്രവർത്തനങ്ങളുടെ ഫലമായി എസ്.എസ്.എൽ.സി. പരീക്ഷയിൽ 235 വിദ്യാർത്ഥികൾക്ക് എല്ലാ വിഷയങ്ങൾക്കും എ പ്ലസ് നേടാൻ സാധിച്ചു. പരീക്ഷയെഴുതിയ 41 % വിദ്യാർത്ഥികളെയും മുഴുവൻ വിഷയത്തിനും എ പ്ലസിലെത്തിച്ച് പേരാമ്പ്ര സബ് ജില്ലയിൽ ഒന്നാം സ്ഥാനത്തെത്താൻ സ്‍കൂളിന് കഴിഞ്ഞു.
ഓൺ ലൈൻ പഠന സംവിധാനം കാര്യക്ഷമമാക്കുന്നതിനും ഓൺലൈൻ പഠന പ്രവർത്തനം എല്ലാ വിദ്യാർത്ഥികൾക്കും ഉറപ്പു വരുത്തുന്നതിനും വേണ്ടി ടി.വി, സ്‍മാർട്ട് ഫോൺ, ടേബ് എന്നിവ നിർധനരായ വിദ്യാർത്ഥികൾക്ക് നൽകാൻ കഴിഞ്ഞു. ക്ലാസ്‍സ് ഗ്രൂപ്പുകളിൽ ക്ലാസ്‍സദ്ധ്യാപകർ നടത്തിയ അന്വേഷണത്തിലൂടെയും, പി.ടി.എ യുടെ സഹകരണത്തോടെയുമാണ് പഠനോപകരണങ്ങൾ ആവശ്യമുള്ള വിദ്യാർത്ഥികളെ കണ്ടെത്തിയത്. അദ്ധ്യാപകർ, മറ്റു ജിവനക്കാർ, പൂർവ്വാദ്ധ്യാപകർ, പൂർവ്വ വിദ്യാർത്ഥികൾ, ക്ലാസ്‍സ് പി.ടി.എ, മറ്റ് വിവിധ ഏജൻസികൾ, സന്നദ്ധ സേവാ സംഘങ്ങൾ എന്നിവരുടെ സഹകരണത്തോടെയാണ് നിർദ്ധനരായ വിദ്യാർത്ഥികൾക്ക് അറുപത്തഞ്ചോളം ഡിവൈസുകൾ കണ്ടെത്തി നൽകിയത്.