ജി എച്ച് എസ്സ് എസ്സ് കണിയൻചാൽ/അക്ഷരവൃക്ഷം/ശുചിത്വം
ശുചിത്വം
ശുചിത്വം എന്നത് നമുക്കേറെ സുപരിചിതമായ ഒന്നാണ്. അതിൻറെ അർഥം നമുക്ക് ഗ്രഹിക്കാൻ കഴിഞ്ഞിട്ടുണ്ടോ എന്നത് സംശയമാണ്. ഒരുപക്ഷെ നാം അതിൻറെ അർത്ഥം ഗ്രഹിച്ചിരുന്നെങ്കിൽ മലിനമായി കിടക്കുന്ന ജലാശയങ്ങളും, മാലിന്യം കുന്നുകൂടി കിടക്കുന്ന റോഡുകളും ഒന്നും കാണില്ലായിരുന്നു. നാം ഇന്ന് എവിടെ നോക്കിയാലും മാലിന്യം മാത്രമാണ് കാണാൻ കഴിയുക. നാം ശ്വസിക്കുന്ന വായുവിലും, കുടിക്കുന്ന വെള്ളത്തിലും, കഴിക്കുന്ന ഭക്ഷണത്തിലും എല്ലാം മാലിന്യമാണ്. അതുവഴി നാം അസുഖത്തെയും പകർച്ചവ്യാധികളെയും വിളിച്ചു വരുത്തുകയാണ് ചെയ്യുന്നത്. ഈ അവസരങ്ങളിലെല്ലാം ശുചിത്വം വെറും വാക്കു മാത്രമാകുന്നു. ഒരർത്ഥത്തിൽ പറഞ്ഞാൽ പകർച്ചവ്യാധികൾ പെരുകുന്നതിനു കാരണം ശുചിത്വക്കുറവ് തന്നെയാണ്. വൃത്തിയുള്ള ഒരു അന്തരീക്ഷത്തിൽ ഒരു രോഗാണുവിനും അധികനേരം പിടിച്ചുനിൽക്കാൻ കഴിയില്ല. നമ്മുടെ ശുചിത്വക്കുറവ് മൂലമാണ് എല്ലാ പകർച്ചവ്യാധികളും പെരുകുന്നത്. നമ്മുടെ ആരോഗ്യത്തിന് ശുചിത്വം ഏറെ അത്യന്താപേക്ഷിതമായ ഒന്നാണ്. ആരോഗ്യമുള്ള ചുറ്റുപാടിന് വൃത്തിയുള്ള അന്തരീക്ഷം വേണം. എങ്കിൽ മാത്രമേ ശാന്തിയും സമാധാനവും നിറഞ്ഞ ഒരു ജീവിതം നമുക്ക് നയിക്കാനാവൂ. നമ്മൾ ജീവിക്കേണ്ട വീടും പരിസരവും വൃത്തിയാക്കേണ്ടത് നമ്മുടെ ഉത്തരവാദിത്വമാണ്. മാലിന്യങ്ങളെ പ്രകൃതിക്കു ദോഷകരമില്ലാതെ സംസ്കരിക്കേണ്ടതും നമ്മുടെ ഉത്തരവാദിത്വമാണ്. ഇതിനോടൊപ്പം തന്നെ വ്യക്തിശുചിത്വം പാലിക്കേണ്ടതും അനിവാര്യമാണ്. നമ്മുടെ ശരീരം വൃത്തിയായി സൂക്ഷിക്കേണ്ടത് നമ്മുടെ കടമയാണ്. ഒരർത്ഥത്തിൽ പറഞ്ഞാൽ പകർച്ചവ്യാധികൾക്കെതിരെയുള്ള ആയുധമാണ് ശുചിത്വം. പരിസരം വൃത്തിയായി സൂക്ഷിച്ചാൽ തന്നെ നമുക്ക് സമാധാനം ലഭിക്കും. മാനവൻറെ ജീവിത സൗകര്യം മെച്ചപ്പെടുത്താനും പുഷ്ടിപ്പെടുത്താനും മാലിന്യ വിമുക്തമായ സാഹചര്യങ്ങൾ അത്യന്താപേക്ഷിതമാണ്. നാം ഒരു നല്ല പ്രകൃതിയെ സ്വപ്നം കാണുന്നുവെങ്കിൽ, അന്തരീക്ഷം മലിനമാവാതെ കത്ത് സൂക്ഷിക്കേണ്ടത് നമ്മുടെ ഓരോരുത്തരുടെയും ഉത്തരവാദിത്വമാണ്. അങ്ങനെ ശുചിത്വം നമ്മുടെ ജീവിതത്തിൻറെ ഭാഗമായി സ്വീകരിക്കാം. അതിലൂടെ പകർച്ചാവ്യാധികളെ ഒരു പരിധി വരെ നമുക്ക് തടയാനാകും. ഇന്ന് നമ്മുടെ ലോകത്തെ മുഴുവനും പിടിച്ചു കുലുക്കിക്കൊണ്ടിരിക്കുന്ന കൊറോണാ വൈറസിനെ ശുചിത്വത്തിലൂടെ നമുക്ക് നേരിടാം. അങ്ങനെ ഒരു ശുചിത്വമുള്ള, ആരോഗ്യമുള്ള ജനതയെ നമുക്ക് വാർത്തെടുക്കാം. അതിനായി നമുക്ക് പരിശ്രമിക്കാം.
|