ഗവ. എൽ. പി. എസ്. അണ്ടൂർ/പ്രവർത്തനങ്ങൾ/2026-27
പ്രവേശനോത്സവം 2026-27
2026-27 അധ്യയന വർഷത്തെ പ്രവേശനോത്സവം ജൂൺ 1-ന് Govt. L.P.S. അണ്ടൂരിൽ വിവിധ പരിപാടികളോടെ സംഘടിപ്പിച്ചു. പുതുതായി പ്രവേശനം നേടിയ വിദ്യാർത്ഥികളെയും അവരുടെ രക്ഷിതാക്കളെയും അധ്യാപകരും പി.ടി.എ. അംഗങ്ങളും ചേർന്ന് ഹൃദ്യമായി സ്വീകരിച്ചു.
ചടങ്ങിൽ സ്കൂൾ പി.ടി.എ. പ്രസിഡന്റ് ശ്രീമതി ഹരീഷ്മ അധ്യക്ഷത വഹിച്ചു. ഹെഡ്മിസ്ട്രസ് ശ്രീമതി ഷൈല ജി. ടീച്ചർ സ്വാഗതം ആശംസിച്ചു. വാർഡ് മെമ്പറും പഞ്ചായത്ത് വൈസ് പ്രസിഡന്റുമായ ശ്രീമതി ശ്രീവത്സലകുമാരി പ്രവേശനോത്സവം ഉദ്ഘാടനം ചെയ്തു.
ഉദ്ഘാടനത്തിനുശേഷം വിദ്യാർത്ഥികൾക്ക് സ്കൂൾബാഗ്, നോട്ട്ബുക്ക്, പെൻസിൽ തുടങ്ങിയ പഠനോപകരണങ്ങൾ സൗജന്യമായി വിതരണം ചെയ്തു. ഹരിത കർമ്മ സേന അംഗങ്ങൾ കുട്ടികൾക്ക് മധുരപലഹാരങ്ങൾ വിതരണം ചെയ്തു. ചടങ്ങിൽ പങ്കെടുത്ത ജനപ്രതിനിധികളും മറ്റ് പ്രമുഖരും കുട്ടികൾക്ക് ആശംസകൾ നേർന്ന് സംസാരിച്ചു.
പ്രവേശനോത്സവത്തിന്റെ ഭാഗമായി വിദ്യാർത്ഥികൾക്കായി പ്രത്യേക ആശംസാ ചുമർ ഒരുക്കിയിരുന്നു. ചടങ്ങിൽ പങ്കെടുത്ത അതിഥികളും രക്ഷിതാക്കളും വിദ്യാർത്ഥികൾക്കുള്ള ആശംസകളും പ്രോത്സാഹന സന്ദേശങ്ങളും ആശംസാ ചുമരിൽ രേഖപ്പെടുത്തി. പുതുതായി സ്കൂളിലെത്തിയ കുട്ടികൾക്ക് അക്ഷരതൊപ്പി നൽകി സ്വീകരണം ഒരുക്കി.
കുട്ടികളുടെയും രക്ഷിതാക്കളുടെയും സന്തോഷ നിമിഷങ്ങൾ പകർത്തുന്നതിനായി ആകർഷകമായ സെൽഫി കോർണറും സജ്ജീകരിച്ചിരുന്നു. നിരവധി രക്ഷിതാക്കളും കുട്ടികളും ഈ അവസരം പ്രയോജനപ്പെടുത്തി ചിത്രങ്ങൾ പകർത്തി.
സ്കൂൾ സ്റ്റാഫ് സെക്രട്ടറി ശ്രീമതി സംന. എസ്. സലിം ടീച്ചർ നന്ദിപ്രകാശനം നടത്തി. തുടർന്ന് കുട്ടികളെ വിവിധ ക്ലാസുകളിലേക്ക് ആനയിക്കുകയും രക്ഷിതാക്കളുമായി അധ്യാപകർ ആദ്യ പി.ടി.എ. യോഗം സംഘടിപ്പിക്കുകയും ചെയ്തു. പുതിയ അധ്യയന വർഷവുമായി ബന്ധപ്പെട്ട നിർദേശങ്ങളും മാർഗനിർദേശങ്ങളും രക്ഷിതാക്കൾക്ക് നൽകി.
വിദ്യാർത്ഥികളിൽ ആത്മവിശ്വാസവും പഠനതാൽപര്യവും വളർത്തുന്ന തരത്തിൽ സംഘടിപ്പിച്ച പ്രവേശനോത്സവം പുതിയ അധ്യയന വർഷത്തിന് ഉജ്ജ്വലമായ തുടക്കമായി.