ഗവ.എച്ച്.എസ്സ്.എസ്സ്.കാരാപ്പുഴ/ചരിത്രം

സ്കൂൾ

സൗകര്യങ്ങൾ

പ്രവർത്തനങ്ങൾ

പ്രൈമറി

എച്ച്.എസ്

എച്ച്.എസ്.എസ്.

ചരിത്രം

അംഗീകാരം

വേളൂർ സർക്കാർ മിഡിൽസ്കൂൾ, എരുത്തിക്കൽ സി.എം.എസ് മിഷൻ വക സ്കൂളുകളും ഉണ്ടായിരുന്ന കാലത്ത് കാരാപ്പുഴയിൽ സാധാരണക്കാർക്ക് പഠിക്കുവാൻ വിദ്യാലയങ്ങൾ ഒന്നും തന്നെ ഉണ്ടായിരുന്നില്ല. സാധാരണക്കർക്ക് ഒന്നും രണ്ടും ക്ലാസ്സുകളുള്ള ഒരു വിദ്യാലയം അറയ്ക്കൽ കുടുംബത്തിലെ കാരണവരായ ശ്രീ. ഗോവിന്ദപ്പിള്ള പ്രവർത്യാരുടെ ശ്രമഫലമായി 112 വർഷങ്ങൾക്കു മുൻപ് കൊല്ലവർഷം 1070-ആണ്ട് സ്ഥാപിതമായി. രണ്ടു ക്ലാസ്സോടുകൂടി തുടങ്ങിയ ആ സ്കൂളാണ് ഇന്ന് സർവ്വതോന്മുഖമായി വളർന്ന് ഹയർ സെക്കണ്ടറിയായി പരിലസിക്കുന്നത്. കിളിരൂർ ശ്രീ. ശങ്കരപ്പിള്ള, കിളിരൂർ ശ്രീ. കൃഷ്ണപ്പിള്ള എന്നിവരായിരുന്നു ആദ്യകാല അദ്ധ്യാപകർ. ആദ്യത്തെ ഹെഡ്മാസ്റ്റർ കിളിരൂർ ശ്രീ. ശങ്കരപ്പിള്ളയായിരുന്നു. കൽത്തൂണിന്മേൽ ഓലമേൽക്കൂരയോടുകൂടി പ്രവർത്യാർ പണിയിച്ച കെട്ടിടം അന്ന് ശാസ്താംകാവ്ക്ഷേത്രത്തിനു തെക്കുവശം പ്രവർത്യാർ വിലകൊടുത്തുവാങ്ങിയ സ്ഥലത്തായിരിന്നു. കൊല്ലവർഷം 1090-ൽ ആണ് സ്കൂൾ ഇപ്പോൾ സ്ഥിതിചെയ്യുന്ന സ്ഥലത്തേക്കുമാറിയത്. സർക്കാർ പുറമ്പോക്കുസ്ഥലത്തിൽ അറയ്ക്കൽ പരേതനായ ശ്രീ. കൃഷ്ണപ്പിള്ളയ്ക്ക് പാട്ടാവകാശമുണ്ടായിരുന്ന 38 സെന്റ് സ്ഥലത്ത് പൊതുജനങ്ങൾ പണിയിച്ചുകൊടുത്ത കെട്ടിടത്തിലാണ് സ്കൂൾ ആരംഭിച്ചത്. 1090-ആണ്ടിൽ കോട്ടയം സബ് രജിസ്ട്രാർ ഓഫീസിൽ 2558-ആ നമ്പരായി രജിസ്റ്റർ ചെയ്ത തീരാധാരമനുസരിച്ച് 38 സെന്റ് സ്ഥലവും കെട്ടിടവും 500 രൂപ സഹായധനം നൽകിക്കൊണ്ട് ഗവൺമെന്റ് ഏറ്റെടുത്തു. 1914 നവംബർ 23ന് 38 സെന്റ് സ്ഥലം പള്ളിക്കൂടം ഡിപ്പാർട്ടുമെന്റിനു വേണ്ടി കിളിരൂർ എൽ.ജി.ഇ.സ്കൂൾ ഹെഡ്മാസ്റ്റർ ശ്രീ. കെ.ഐ. പരമേശ്വരൻപ്പിള്ള ഏറ്റുവോങ്ങിയതായി സ്കൂൾ റെക്കാർഡുകളിൽ നിന്ന് മനസ്സിലാക്കുന്നു. കാരാപ്പുഴ കരയോഗം, നായർ പരസ്പര സഹായസംഘം, കോട്ടയം നായർ സമോജം, രാമവർമ്മ യൂണിയൻ ക്ലബ്ബ് തുടങ്ങിയ സംഘടനകൾ സ്കൂൾ സ്ഥാപിക്കുന്നതിനും സ്കൂളിന്റെ വളർച്ചയ്ക്കും വേണ്ട നേതൃത്വം, സഹായസഹകരണങ്ങൾ നൽകി. തുടർന്ന് നാലാം ക്ലാസ്സു വരെ ആയിരുന്ന ഈ സ്കൂളിന്റെ പേര് കാരാപ്പുഴ വെർണാക്കുലർ പ്രൈമറി സ്കൂൾ എന്നായി. 24/10/1118-ന് ഇവിടെ അഞ്ചാം ക്ലാസ്സ് ആരംഭിച്ചു. 19/8/1121-ൽ 28 സെന്റ് സ്ഥലം കൂടി പൊന്നും വിലയ്ക്ക് എടുത്തതോടുകൂടി സ്കൂൾ കോമ്പൗണ്ടിന്റെ വിസ്തൂർണം 66 സെന്റായി വർദ്ധിച്ചു. 1950-ൽ മലയാളം, ഇംഗ്ലീഷ് മിഡിൽ സ്കൂളുകൾ തമ്മിൽ വ്യത്യാസമില്ലാതെ ആയതിനാൽ കാരാപ്പുഴ മിഡിൽസ്കൂൾ എന്ന പേര് സ്കൂളിന് ലഭിച്ചു. സ്കൂൾ ഡവലപ്പ്മെന്റ്കമ്മിറ്റി സ്കൂൾ ഹൈസ്കൂൾ ആയി ഉയർത്തണമെന്നു വിദ്യാഭ്യാസമന്ത്രിയ്ക്ക് നിവേദനം നൽകി. 1961-ൽ സ്കൂൾ ഹൈസ്കൂളായി ഉയർത്തി തീരുമാനിച്ചു. 1966-ൽ പത്താം ക്ലാസ്സ് അനുവദിച്ച് ഒരു പൂർ ഹൈസ്കൂളാകുകയും ശ്രീ. പി.കെ. വാസുദേവൻനായർ ആദ്യത്തെ ഹെഡ്മാസ്റ്ററായി നിയമിക്കപ്പെടുകയും ചെയ്തു. 1990-ൽ സ്കൂളിനോടനുബന്ധിച്ച് ഹയർ സെക്കന്ററി വിഭാഗവും ആരംഭിച്ചു. ഇന്ന് കാരാപ്പുഴ ഗവൺമെന്റ് ഹയർ സെക്കന്ററി സ്കൂൾ കോട്ടയം ജില്ലയിലെ മികച്ച സ്കൂളായി മാറികഴിഞ്ഞിരിക്കുന്നു. തുടർച്ചയായി എട്ടുവർഷം എസ്.എസ്.എൽ.സി യ്ക്ക് 100% വിജയം നേടുന്നു. കലാകായിക മത്സരങ്ങളിലും ഈ സ്കൂൾ മികച്ച നിലവാരം പുലർത്തുന്നു. ശാസ്ത്രമേളകളിൽ തുടർച്ചയായി ഓവറോൾ സ്ഥാനം നിലനിർത്തിക്കൊണ്ടിരിക്കുന്നു.