കെ.എം.ജി.വി.എച്ച്. എസ്.എസ്. തവനൂർ/ചരിത്രം
| സ്കൂൾ | സൗകര്യങ്ങൾ | പ്രവർത്തനങ്ങൾ | എച്ച്.എസ് | എച്ച്.എസ്.എസ്. | വി.എച്ച്.എസ് | ചരിത്രം | അംഗീകാരം |
1960 ൽ 'സർവ്വോദയപുരം പോസ്റ്റ്‌ ബേസിക്‌ സ്കൂൾ' എന്ന പേരിലാണ് ഈ വിദ്യാലയം നിലവിൽ വന്നത് .കേരളഗാന്ധി എന്നറിയപ്പെടുന്ന പ്രമുഖ സ്വാതന്ത്ര്യസമരപോരാളിയും, ഗാന്ധിയനും, സോഷ്യലിസ്റ്റു ചിന്തകനുമായിരുന്ന ശ്രീ.കെ.കേളപ്പനാണ് ഈ സ്ഥാപനത്തിനു തുടക്കം കുറിച്ചത് . കേവലം 24 കുട്ടികളെ മാത്രം ഉൾപ്പെടുത്തിയാണ് ആദ്യ എട്ടാം ക്‌ളാസ് പഠനമാരംഭിച്ചത്. പൂർണമായും ഗാന്ധിയൻ വിദ്യാഭ്യാസ ദർശനങ്ങളുടെ മുല്യങ്ങൾ ഉൾക്കൊണ്ടുകൊണ്ടായിരുന്നു അധ്യയനം. ഓരോ വിദ്യാർത്ഥിയും കൃഷിയോ നൂൽനൂൽപ്പോ വിദ്യാഭ്യാസ പരിപാടിയുടെ ഭാഗമായിതന്നെ അഭ്യസിച്ചിരുന്നു. എല്ലാ കുട്ടികളും ഇവിടെത്തന്നെ താമസിച്ചുപഠിക്കുന്നരീതിയായിരുന്നു അവലംബിച്ചിരുന്നത് . പായത്തടുക്കുകളും സ്റ്റൂളുകളുമാണ് ഡസ്കുകൾക്കും ബെഞ്ചുകൾക്കും പകരമായി ഉപയോഗിച്ചിരുന്നത്.
ഒരു പ്രദേശത്തിന്റെ തന്നെ സാംസ്‌കാരിക വളർച്ചക്കും പുരോഗതിക്കും വഴികാട്ടിയായിത്തീർന്ന ഈ വിദ്യാഭ്യാസസ്ഥാപനത്തിന്റെ ആദ്യ മാനേജർ മാഹിയിലെ സർവ്വോദയ പ്രവർത്തകനായ ശ്രീ. ഐ. കെ. കുമാരൻ മാസ്റ്ററും പ്രഥമ ഹെഡ്‌മിസ്‌ട്രസ്‌ ശ്രീമതി. യു. നാണിക്കുട്ടി (കൊയിലാണ്ടി) യുമായിരുന്നു.
ആദ്യ കാലങ്ങളിൽ വിദ്യാലയത്തിന്റെ നടത്തിപ്പ് ശ്രീ. കെ കേളപ്പന്റെ നേതൃത്വത്തിലായിരുന്നുവെങ്കിലും പിന്നീട് ആരോഗ്യപരമായ കാരണങ്ങളാൽ നടത്തിപ്പിന് പ്രയാസം നേരിട്ടതിനെ തുടർന്ന് ഇതിന്റെ ചുമതല തവനൂർ വാസുദേവൻ നമ്പൂതിരിപ്പാട്‌ പ്രസിഡന്റായ ട്രസ്റ്റിന്‌ കൈമാറുകയുണ്ടായി. 1971 ൽ കേളപ്പജി അന്തരിച്ചതോടെ അദ്ദേഹത്തിന്റെ സ്‌മരണക്കായി ഈ വിദ്യാലയം 'കേളപ്പൻ മെമ്മോറിയൽ പോസ്റ്റ്‌ ബേസിക്‌ സ്കൂൾ' എന്ന് നാമകരണം ചെയ്യപ്പെടുകയും 1981 ജനുവരി 1ന്‌ സർക്കാരിന് കൈമാറിയതോടെ കേളപ്പൻ മെമ്മോറിയൽ ഗവ: വൊക്കേഷണൽ ഹയർ സെക്കണ്ടറി സ്കൂൾ അതിന്റെ ശ്രദ്ധേയമായ ഒരു ഘട്ടം പിന്നിടുകയും ചെയ്‌തു.
ഹൈസ്‌ക്കൂൾ ക്ലാസ്സുകൾ കൂടാതെ വോക്കഷണണൽ ഹയർ സെക്കണ്ടറി, ഹയർസെക്കന്ററി എന്നീ കോഴ്‌സുകളും ഇവിടെ നടക്കുുന്നു. 1984ൽ ആണ്‌ വി.എച്ച്.എസ്.ഇ. സ്‌കൂളിൽ ആരംഭിക്കുത്‌. കൃഷിക്ക്‌ അനുയോജ്യമായ വിശാലമായ പാടശേഖരം സ്‌കൂളിന്‌ സ്വന്തമായുള്ളത്‌ ഒരു അഗ്രിക്കൾച്ചർ കോഴ്‌സ്‌ ആരംഭിക്കുതിന്‌ കാരണമായി.
2004 ലാണ്‌ ഹയർ സെക്കന്ററി കോഴ്‌സ്‌ ആരംഭിക്കുന്നത്‌. അതോടുകൂടി വി.എച്ച്.എസ്.ഇ.യും ഹയർ സെക്കന്ററിയും ഒരുമിച്ചുള്ള സ്ഥാപനമായി ഈ വിദ്യാലയം മാറി.