കരീമഠം ഗവ ഡബ്ലു യുപിഎസ്/അക്ഷരവൃക്ഷം/ തേന്മാവ്

തേന്മാവ് ഞാനിന്ന് പരിചയപ്പെടുത്തുവാൻ പോകുന്നത് എൻറെ വീടിനുമുന്നിലുള്ള മാവിനെയാണ്. ഇത് കിളിച്ചുണ്ടൻമാവാണ്. ഈ മാവിന് ഏതാണ്ട് 50 വയസ്സ് പ്രായമുണ്ട്. ഈ മാവ് തോടിന്റെ വശത്തായിട്ടാണ് വളരുന്നത്. ധനുമാസം ആകുമ്പോഴേക്കും മാവ് പൂത്തുതുടങ്ങും. കണ്ണിമാങ്ങ ഉണ്ടാകുമ്പോൾ അത് പറിച്ച് ഉപ്പിലിടാം. മാങ്ങ വലുതാകുമ്പോൾ അച്ചാറിടാനും ചമ്മന്തി അരയ്ക്കാനും ഉപയോഗിക്കാം. മാങ്ങയുടെ കൂടെ ചക്കകുരുവോ, മുരിങ്ങാക്കായോ ഉണ്ടെങ്കിൽ ചാറു കറി ഉണ്ടാക്കാം. വേനൽക്കാലമായാൽ മാവിന്റെ ചില്ലകളിലെ മാങ്ങകൾ പഴുത്തു തുടങ്ങും. പിന്നെ ആഘോഷമാണ് നിറയെ അതിഥികൾ തേടിയെത്തും. അണ്ണാറക്കണ്ണനും കിളികളുമെല്ലാമെത്തും. താഴത്തെ കൊമ്പുകളിൽ വളർന്നിരിക്കുന്ന മാങ്ങകൾ ഞങ്ങൾ പറിച്ചെടുക്കും. തോട്ടിയെത്താത്ത കൊമ്പുകളിൽ മാങ്ങകളുടെ അവകാശം അണ്ണാനും കിളികൾക്കുമാണ്. മാവിന്റെ ഒരു കൊമ്പിലായി ഒരു കൊച്ചുകിളിക്കൂട് ഉണ്ട്. കാക്കത്തമ്പുരാട്ടിയുടെ കൂടാണിത്. ഇതിൽ മൂന്നു കുഞ്ഞുങ്ങളുമുണ്ട്. മാവിലേക്ക് മറ്റ് പക്ഷികളെ കാക്കത്തമ്പുരാട്ടി കൊത്തിയോടിക്കും. തേൻകിനിയുന്ന മാങ്ങയ്ക്ക് എന്തുരുചിയാണെന്ന് കഴിച്ചാലേ മനസ്സിലാകൂ.പഴമാങ്ങ ഉപയോഗിച്ച് നിരവധി വിഭവങ്ങൾ ഉണ്ടാക്കാം. പഴമാങ്ങ ജ്യൂസ്, എസ്ക്രീം, മാമ്പഴപുളിശ്ശേരി എന്നിവ ഉണ്ടാക്കാം. മാങ്ങാണ്ടി കിളിർപ്പിച്ചാൽ മാവിന്റെ കുഞ്ഞുമായി. ഭക്ഷണത്തിന് മാത്രമല്ല മാവ് മറ്റ് നിരവധി ഉപയോഗങ്ങൾ മാവിനുണ്ട്. മാവിൻറെ പച്ചകുട നിവർത്തിയതുപോലുള്ള ഇലകൾ തണലേകുന്നു. അതിൻറെ അടിയിലാണ് ഞങ്ങൾ കളിക്കുന്നത് വർഷക്കാലത്ത് തോടിന്റെ കരയിലായതിനാൽ മണ്ണൊലിപ്പ് തടയുന്നു. മരവാഴ മാവിലാണ് സ്ഥാനമുറപ്പിച്ചിരിക്കുന്നത്. മാവ് അതിനും തണലൊരുക്കുന്നു. ഓണക്കാലമായാൽ ഊഞ്ഞാലിടുന്നത് മാവിന്റെ കൊമ്പിലാണ്. ഇങ്ങനെ ആഘോഷങ്ങൾക്കെല്ലാം മാവും സാക്ഷ്യം വഹിക്കുന്നു. പക്ഷികൾക്ക് കൂടൊരുക്കിയും മാവ് കഴിയുന്നു.മാങ്ങ മാത്രമല്ല മാവിലയും തടിയുമെല്ലാമുപയോഗിക്കാം. പണ്ട് കാലത്ത് മാവിലയുപയോഗിച്ചാണ് എല്ലാവരും പല്ല് തേച്ചിരുന്നത്. മാവിലയുപയോഗിച്ച് കുട്ടിബാഗ് ഉണ്ടാക്കി കുട്ടികളും സമയം ചിലവഴിച്ചു. മാവിൻ തടി ഉപയോഗിച്ച് വീടിന് ജനൽ, വാതിൽ, ഫർണീച്ചർ എന്നിവ നിർമ്മിക്കാം. കൂടാതെ ഭക്ഷണ പാകം ചെയ്യാൻ വിറകായും ഉപയോഗിക്കാം. ശുദ്ധവായു ലഭിക്കുന്നു ഉണങ്ങിയ മാവില മണ്ണിനോട് ചേരുമ്പോൾ അത് മറ്റ് ചെടികൾക്ക് വളമാകുന്നു. മാവിൽ മാങ്ങകൾ ധാരാളമായി ഉണ്ടാകുമ്പോൾ അതിൻറെ ചില്ലകൾ ഭാരം കാരണം താഴേക്ക് കുനിയുന്നു. സമൃദ്ധി കൂടുന്തോറും അതിൽ അഹങ്കരിച്ച് തലക്കനത്തോടെ ജീവിക്കാതെ വിനയം ഉണ്ടാകണമെന്ന പാഠം ഇതിലൂടെ മാവ് പറഞ്ഞു നല്കുകയും ചെയ്യുന്നു. കൃപ രാജീവ് 7 എ കരീമഠം ഗവ ഡബ്ലു യുപിഎസ് കോട്ടയം വെസ്റ്റ് ഉപജില്ല കോട്ടയം അക്ഷരവൃക്ഷം പദ്ധതി, 2020 കഥ  സാങ്കേതിക പരിശോധന - Kavitharaj തീയ്യതി: 26/ 04/ 2020 >> രചനാവിഭാഗം - കഥ