കാവും കുളങ്ങളും കായലോളങ്ങൾ -
തൻ കാതിൽ ചിലമ്പുന്ന കാറ്റും
കാടുകൾക്കുള്ളിലെ സസ്യവൈവിധ്യവും
ഭൂതകാലത്തിന്റെ സാക്ഷ്യം
അമ്മയാം വിശ്വപ്രകൃതി നമുക്കു തന്ന
സൗഭാഗ്യങ്ങളെല്ലാം നന്ദിയെന്യേ തിരസ്കരിച്ചു .
നമ്മൾ , നന്മ മനസ്സിലില്ലാത്തവർ !
മുത്തിനെപ്പോലും കരിക്കട്ടയാക്കുന്ന
ബുദ്ധിയില്ലാത്തവർ നമ്മൾ .
മുഗ്ദ്ധ സൗന്ദര്യത്തെ വൈരൂപ്യമാക്കുവാ-
നൊത്തൊരുമിച്ചവർ ! കാരിരുമ്പിന്റെ ഹൃദയങ്ങളെത്രയോ
കാവുകൾ വെട്ടി വെട്ടിത്തെളിച്ചു.
