എൽ പി എസ് കോവുക്കുന്ന്/ചരിത്രം

ചരിത്രം

കായക്കൊടി പഞ്ചായത്തിലെ കോവുക്കുന്ന് പ്രദേശത്തെ വിദ്യാഭ്യാസ, സാംസ്‌കാരിക ഉന്നതിയുടെ വഴികളിൽ ഒരു കേന്ദ്രബിന്ദുവായി നിലകൊണ്ട സ്ഥാപനമാണ് കോവുക്കുന്ന് എൽ.പി. സ്‌കൂൾ. കർഷകർ, കർഷകതൊഴിലാളികൾ, മറ്റു തൊഴിലിൽ ഏർപ്പെടുന്ന സാധാരണ ജനവിഭാഗങ്ങൾ ജീവിക്കുന്ന പ്രദേശമാണ് കോവുക്കുന്ന്. ആദ്യകാല പഠിതാക്കളിൽ ഭൂരിഭാഗത്തിനും അന്നത്തെ സാമൂഹിക സാഹചര്യത്തിന്റെ ഫലമായി ഉപരിപഠനം നടത്താനോ, വിദ്യാഭ്യാസ മേഖലയിൽ ശോഭിക്കാനോ കഴിഞ്ഞിരുന്നില്ല. എന്നാൽ പിന്നീട് കോവുക്കുന്ന് എൽ.പി സ്‌കൂളിൽ ആദ്യാക്ഷരം കുറിച്ച് നിരവധി പഠിതാക്കൾ സമൂഹത്തിൽ അറിയപ്പെടുന്നവരും, ഡോക്ടർ, എഞ്ചിനിയർമാർ തുടങ്ങിയ മേഖലയിൽ തിളങ്ങി നിന്നവരും ആയി മാറിയിട്ടുണ്ട്. 1952 ഡിസംബർ 1-ം തീയതി സ്ഥാപിതമായ കോവുക്കുന്ന് എൽ.പി സ്‌കൂളിന്റെ കഴിഞ്ഞ കാലത്തിലേക്ക് നമുക്കൊന്ന് കണ്ണോടിക്കാം.

                കോഴിക്കോട് ജില്ലയുടെ കിഴക്കൻമലയോരത്ത് വടകര താലൂക്കിലെ കായക്കൊടി പഞ്ചായത്തിലെ കോവുക്കുന്ന് എന്ന പ്രദേശത്താണ് ഈ വിദ്യാലയം സ്ഥിതി ചെയ്യുന്നത്. ഗോക്കൾ മേഞ്ഞു നടക്കുന്ന ഗോവുക്കുന്ന് സ്ഥലം ക്രമേണ കോവുക്കുന്ന് എന്നായി മാറുകയായിരുന്നു. അതു തന്നെയാണ് ഈ വിദ്യാലയത്തിന് നൽകിയ പേരും. കോവുക്കുന്ന് എൽ.പി സ്‌കൂൾ നിലവിൽ വരുന്നതിന് മുമ്പ് ഗുരുകുല വിദ്യാഭ്യാസമായിരുന്നു ഇവിടെ ഉണ്ടായിരുന്നത്.
                1940-50 കാലഘട്ടത്തിൽ ഒരു വിദ്യാലയം ഇവിടെ സ്ഥാപിച്ചെങ്കിലും അതിന് അംഗീകാരം കിട്ടാതെ പോവുകയും തുടർന്ന് 1952ൽ ശ്രീ. പി. മൊയ്തു മാസ്റ്റർ ചമ്പംകുനിയിൽ കോവുക്കുന്ന് എൽ.പി. സ്‌കൂൾ സ്ഥാപിക്കുകയും ചെയ്തു. 1952 ഡിസംബർ 2-ം തിയ്യതി സ്‌കൂളിന്റെ ഉദ്ഘാടനം ഒദ്യോഗികമായി നടന്നു. സ്‌കൂളിന്റെ മാനേജരും ശ്രീ. മൊയ്തു മാസ്റ്റർ തന്നെയായിരുന്നു. മൊയ്തു മാസ്റ്ററുടെ മരണശേഷം മാനേജർമാർ മാറി മാറി വരികയും  കുളങ്ങര പവിത്രൻ മാനേജരാവുകയും ചെയ്തു. പിന്നീട് മുക്തിയാർ പി.കെ. ഗനീഷിന് മാനേജർ സ്ഥാനം നൽകുകയും ചെയ്തു.