എസ് എസ് ഒ എച്ച് എസ്, ലക്കിടി/എന്റെ ഗ്രാമം

കിളളിക്കുറിശ്ശി മംഗലം

പാലക്കാട് ജില്ലയിൽ ഒറ്റപ്പാലത്തടുത്ത് ലക്കിടിയിൽ ആണ് കിളളിക്കുറിശ്ശി മംഗലം സ്ഥിതി ചെയ്യുന്നത്. പ്രസിദ്ധമായ കിളളിക്കുറിശ്ശി മഹാദേവ ക്ഷേത്രം ഇവിടെ സ്ഥിതി ചെയ്യുന്നതു കൊണ്ടാണ് ഈ സ്ഥലത്തിന് 'കിളളിക്കുറിശ്ശി മംഗലം' എന്ന പേര് ലഭിച്ചത്.പണ്ട് ഈ പ്രദേശത്തിന്റെ നാമം ശുകപുരം എന്നായിരുന്നു. ഈ പേരുവരുന്നതിനുകാരണം ശ്രി ശുകമഹർഷി പ്രതിഷ്ടിച്ച ശിവാലയത്തിനു സമീപമുള്ള പ്രദേശമായതുകൊണ്ടാണ് ശുകപുരം എന്നപേരുവന്നത്. തുളളൽ കവിതകളുടെ ഉപജ്ഞാതാവായ കുഞ്ചൻ നമ്പ്യാരുടെ ജന്മം കൊണ്ട് അനുഗ്രഹീതമാണ് ഈ ഗ്രാമം. ക്ഷേത്രത്തിനടുത്തുള്ള കലക്കത്താണ് കുഞ്ചൻ നമ്പ്യാരുടെ ജന്മഗ്രഹം. ഇദ്ദേഹത്തിന്റെ ജന്മഗ്രഹം ഗവർണ്മേന്റ് ഏറ്റെടുത്ത് അദ്ദേഹത്തിന്റെ ഒരു സ്മാരകം അവിടെ നിർമിച്ചിട്ടുണ്ട്. കൂടാതെ അദ്ദേഹത്തിന്റെ പേരിൽ ഒരു കലാപീഠം കൂടി അടുത്തിടയ്ക്ക്ക്കായി സ്ഥാപിച്ചിട്ടുണ്ട്. അവിടെ തുള്ളൽ, നൃത്തം, പാട്ട് മുതലായ കലകൾ ഇവിടെ പഠിപ്പിക്കുന്നുണ്ട്. നിളയുടെ തീരത്തുള്ള ഈ സുന്ദരമായ ഗ്രാമത്തിൽ ജന്മം നൽകിയ കലാകാരൻമാർ ധാരാളമാണ്. ചാക്യാർ കൂത്തിൽ വളരെ പ്രസിദ്ധനായ പത്മശ്രീ ശ്രീ. മാണിമാധവ ചാക്യാർ കിളളിക്കുറിശ്ശി മംഗലത്താണ് താമസിച്ചിരുന്നത്. മിഴാവിൽ വളരെ പ്രസിദ്ധനായ ശ്രീ. നാരായണനമ്പ്യാർ (ചാക്യാരുടെ മകൻ) മിഴാവിൽ ഇന്ന് ജീവിച്ചിരിക്കുന്നവരിൽ പ്രസിദ്ധനായ കലാകാരനാണ്. അദ്ദേഹത്തിന്റെ പേരിലും ഒരു ഗുരുകുലം ഇവിടെ പ്രവർത്തിക്കുന്നുണ്ട്. അവിടെ ചാക്യാർ കൂത്ത്, നങ്ങ്യാർ കൂത്ത്, പാഠകം മുതലായവ പഠിപ്പിക്കുന്നുണ്ട്. കലകളുടെ മധുരം തൊട്ടറിഞ്ഞ ചൈതന്യ മാർന്ന ഈ സുന്ദരഗ്രാമം വാക്കുകൾകൊണ്ട് മാത്രം പറയാൻ കഴിയാത്ത പ്രസിദ്ധിയിലാണ്..