ഉലയൂതിയൂതി
നെരിപ്പോടിൽ
അഗ്നി മഴയിൽ എന്നമ്മ
വിരൽ തലപ്പുകൾ
വാടും വരെ
കാഴ്ചപ്പുറങ്ങളെ
വേനലിറുക്കങ്ങളിൽ
മേയാനിടുമെന്നമ്മ..!
വടുക്കൾ പാർത്ത
ഓർമത്താളുകളിൽ
വെള്ളത്തണ്ടുകൾ കൊണ്ട്
അവസാനത്തെ
മണിക്കൂറിലും
ആകാശം പണിയുമെന്നമ്മ..!
അംഗഭംഗം വന്ന
പകലറുതികൾ
ഊതിക്കാച്ചി
ഉദയാസ്തമയങ്ങളുടെ
ഉച്ചയുറക്കങ്ങളിൽ മെഴുകുതിരി പോലുരുകുമെന്നമ്മ..!
പങ്കുവെയ്പ്പിന്റെ
സ്നേഹ പൂന്തോട്ടങ്ങളിൽ കണ്ണീരാൽ മാറോടു ചേർക്കുമെന്നമ്മ..!
ഞാനെന്ന കുഞ്ഞുമരത്തിൻ
തണലിൽ അമ്മക്കിളിതൻ സ്വപ്നം തളിർത്തിടേണം..
കാണുന്നു ഞാനെൻ കുഞ്ഞു കിനാവിലെല്ലാം..
