അസംപ്ഷൻ യു പി എസ് ബത്തേരി/അക്ഷരവൃക്ഷം/പരിസ്ഥിതി സംരക്ഷണവും ആധുനിക ജീവിതവും

Schoolwiki സംരംഭത്തിൽ നിന്ന്

അക്ഷരവൃക്ഷം - ലേഖനം

പരിസ്ഥിതി സംരക്ഷണവും ആധുനിക ജീവിതവും
                                  മനുഷ്യൻ പ്രകൃതിയെ ആശ്രയിച്ചാണ് കഴിയുന്നത്. പ്രകൃതിക്ക് മാറ്റം വരുത്തുമ്പോൾ പല പ്രശ്നങ്ങളെയും അവന് അഭിമുഖീകരിക്കേണ്ടി വരും. പല തരത്തിൽ പ്രകൃതിക്ക് ഭീഷണി സൃഷ്ടിക്കുമ്പോൾ പ്രകൃതി മനുഷ്യനെ കീഴടക്കുന്നു. പരിസ്ഥിതിക്ക് ഹാനികരമായ മനുഷ്യന്റെ കർമ്മങ്ങൾ എന്തൊക്കെയാണ് ? നിരവധി രൂപത്തിലുള്ള മലിനീകരമാണ് ആദ്യത്തേത്. പ്രകൃതി മലിനീകരണം, അന്തരീക്ഷ മലിനീകരണം, ശബ്ദമലിനീകരണം, ജലമലിനീകരണം, എല്ലാം ആ വിഭാഗത്തിലാണ് വരുന്നത്. ഭൂമിയിലെ ആവാസ വ്യവസ്ഥക്ക് പ്രകൃതി ഒരു ക്രമീകരണം വരുത്തിയിട്ടുണ്ട്. അതിനെ തകിടം മറിക്കുന്ന മലിനീകരണം പരിസ്ഥിതിക്ക് ബാധകമാണ്. പ്ലാസ്റ്റിക്കുപോലുള്ള ഖരപദാർത്ഥങ്ങളും വലിച്ചെറിയുന്ന ചണ്ടികളും മണ്ണിനെ ദുഷിപ്പിക്കുന്നു. എൻഡോസൾഫാൻ പോലുള്ള കീടനാശിനികൾ ജലത്തെ ദുഷിപ്പിക്കുന്നു. വൻ വ്യവസായ ശാലകൾ പുറത്തു വിടുന്ന പുക അന്തരീക്ഷത്തെ മലിനമാക്കുന്നു. പെട്രോളിയം ഉൽപ്പന്നങ്ങൾ കത്തുമ്പോൾ ഉയരുന്ന വാതകങ്ങൾ അന്തരീക്ഷത്തിലെ താപനിലയ്ക്ക് മാറ്റം വരുത്തുന്നു. ഭൂമിക്ക് ശാപമാകുന്ന ഈ വാതകങ്ങൾ ഓസോൺ പാളിക്ക് തകരാറുണ്ടാക്കുന്നു. സമുദ്രത്തിൽ എണ്ണകലരുന്നതും ജലാശയങ്ങൾ ചുരുങ്ങുന്നതും പരിസ്ഥിതിക്ക് കോട്ടം വരുത്തുന്നതാണ്. വനനശീകരണം കേരളത്തിലെ ജൈവഘടനയിൽ ശക്തമായ മാറ്റം വരുത്തി. വന സംരക്ഷണത്തിലൂടെ മാത്രമേ വനനശീകരണം തടയാനാകൂ. കൃഷിയുടെ അളവ് കുറച്ച്, വിളവ് കൂട്ടാൻ മനുഷ്യൻ രാസ വളങ്ങളും ധാരാളം കീടനാശിനികളും ഇന്നുപയോഗിക്കുന്നു. ഇത് മണ്ണിന്റെയും ജലത്തിന്റെയും പാരസ്‍പര്യത്തെ തകർക്കും. മണ്ണിലുള്ള നൈട്രജൻ ഘടനയ്ക്ക് മാറ്റം വരുത്തും. പരിസ്ഥിതിക്ക് ഏൽക്കുന്ന വമ്പിച്ച ദോഷമാണിത്. ഭൂഗർഭ സമ്പത്ത്-ജലം, ഇരുമ്പ്, കൽക്കരി, സ്വർണ്ണം തുടങ്ങിയവ ഖനനം ചെയ്തോ ഊറ്റിയോ എടുക്കുന്നതു കൊണ്ട് ആന്തരിക ഘടനയ്ക്ക് മാറ്റം വരാം. ഭൂമികുലുക്കം, ഭൂകമ്പം എന്നിവ അങ്ങനെയാണ് സംഭവിക്കുക. സമഗ്രവും സമീകൃതവുമായ പ്രപഞ്ച ജീവിത ഘടന അറിഞ്ഞോ അറിയാതെയോ മനുഷ്യൻ തന്നെ തെറ്റിക്കുമ്പോൾ ഉണ്ടാകുന്ന വിപത്ത് വളരെ വലുതാണ്. ധനം സമ്പാദിക്കുന്നതിന് മനുഷ്യൻ ഭൂമിയെ ചൂഷണം ചെയ്യുമ്പോൾ മാതൃത്വത്തെയാണ് നാം തകർക്കുന്നതെന്നോർക്കണം.
ആൻതെരേസ് അലക്സ്
4 B അസംപ്ഷൻ എ യു പി എസ് ബത്തേരി
സുൽത്താൻ ബത്തേരി ഉപജില്ല
വയനാട്
അക്ഷരവൃക്ഷം പദ്ധതി, 2020
ലേഖനം


 സാങ്കേതിക പരിശോധന - shajumachil തീയ്യതി: 20/ 06/ 2020 >> രചനാവിഭാഗം - ലേഖനം