അബ്ദുള്ള മെമ്മോറിയൽ എം. എൽ. പി സ്കൂൾ കാഞ്ഞിരാട്ടുതറ തിരുവള്ളൂർ/ചരിത്രം
| സ്കൂൾ | സൗകര്യങ്ങൾ | പ്രവർത്തനങ്ങൾ | ക്ലബ്ബുകൾ | ചരിത്രം | അംഗീകാരം |
ചരിത്രം
തിരുവള്ളൂർ പ‍ഞ്ചായത്തിലെ കാഞ്ഞിരാട്ടുതറ പ്രദേശത്താണ് സ്കൂൾ സ്ഥിതി ചെയ്യുന്നത്. ഇതൊരു മുസ്ലിം ഭൂരിപക്ഷ പ്രദേശമാണ്. ബാവുപ്പാറ ശിവക്ഷേത്രത്തിനടുത്ത് പുതിയ സ്കൂൾ എന്ന പേരിൽ അറിയപ്പെടുന്ന പുതുവാരിക്കോട് സ്കൂൾ ഉണ്ടായിരുന്നു. മുസ്ലിങ്ങൾ മതപഠനത്തിൽ മാത്രം ഒതുങ്ങി നിന്ന ഒരു കാലഘട്ടം. ഭൗതിക വിദ്യാഭ്യാസത്തെപ്പറ്റി ചിന്തിക്കാത്തതിനാൽ മുസ്ലിങ്ങൾ ഇവിടെ പഠിച്ചില്ല. ഈയൊരു സാഹ്ചര്യത്തിലാണ് കണ്ണങ്കോട്ട് കുഞ്ഞിരാമക്കുറുപ്പ് ബാവുപ്പാറ പ്രദേശത്ത് ചെറുവോട്ട് മഠത്തിലെ മുസ്ലിങ്ങളുമായി ബന്ധപ്പെടുന്നതും പള്ളിക്കൂടം സ്ഥാപിക്കുന്നതും. ഇവിടെ നിസ്കാരപ്പള്ളിക്കടുത്ത് മതപഠനം നടത്തിയിരുന്ന ഓത്തുപുരയിലാണ് ആദ്യം ക്ലാസ് തുടങ്ങിയത്. പിന്നീട് പനയോല കൊണ്ട് പകുതി മറച്ച ഒരു ഷെഡിലാക്കി. ഇത് സ്ഥാപിച്ചത് 1934 ഘട്ടത്തിലാണ്. ചെറുവോട്ട് മഠത്തിലുണ്ടായിരുന്ന പള്ളിക്കൂടത്തിന് ഒരു സ്ഥിരം കെട്ടിടം പണിയാനുള്ള സ്ഥലസൗകര്യം ഉണ്ടായിരുന്നില്ല. കുറ്റ്യാടി പുഴയുടെ വക്കിൽ കണ്ണനാണ്ടിയിലേക്ക് പള്ളിക്കൂടം മാറ്റി. അതോടൊപ്പം മാനേജ്മെന്റിലും കൈമാറ്റം നടന്നു. സ്കൂളിന് ഒരു പുതിയ കെട്ടിടം ഉണ്ടായി. കണ്ണനാണ്ടിയിൽ പള്ളിക്കൂടം പ്രവർത്തിച്ചു കൊണ്ടിരുന്ന കാലത്ത് പുരാതനമായ കാഞ്ഞിരാട്ടുതറ ജുമാമസ്ജിദിനു സമീപം ഒരു മദ്റസ സ്ഥാപിതമായി. ഇവിടെ പഠിക്കുന്ന കുട്ടികൾക്ക് മതപഠനം ഒരു ദിക്കിലും ഭൗതിക പഠനം മറ്റൊരു ദിക്കിലുമായിരുന്നു. അങ്ങനെയിരിക്കെ പൂതയിൽ കുടുംബവുമായി സ്കൂൾ മാറ്റത്തെപ്പറ്റി ചർച്ച തുടങ്ങി. ഗോപാലക്കുറുപ്പ് കുളമുള്ളതിൽ അബ്ദുല്ലക്ക് സ്കൂൾ കൈമാറി. ഇതിന്റെയൊക്കെ പിന്നിൽ കൂമുള്ളി അഹമ്മദ് സാഹിബിന്റെ അശ്രാന്ത പരിശ്രമമുണ്ടായിരുന്നു. പിന്നീട് സ്കൂളിന്റെ മാനേജരായി തുടർന്നുവന്ന കുളമുള്ളതിൽ അബ്ദുള്ളയുടെ മകനായ താഴെ മെന്മേനി കുഞ്ഞിസൂപ്പി 13.06.2009 ന് മരണപ്പെടുകയുണ്ടായി. ഇതിനെ തുടർന്ന് പരേതനായ കുഞ്ഞിസൂപ്പിയുടെ അനന്തരാവകാശികളിൽ മാതാവും കുഞ്ഞിസൂപ്പിയുടെ ഭാര്യയുമായ താഴെ മെന്മേനി കുഞ്ഞാമി 27.03.2010 മുതൽ 05.03.2014 വരെ താൽക്കാലിക മാനേജരായി . അവർ സ്കൂൾ മാനേജ്മെന്റ് സ്ഥല ഉടമ കൂടിയായ കുഞ്ഞമ്മദ് കെ.എം ന് കൈമാറി. 10.07.2018 മുതൽ കുഞ്ഞമ്മദ് കെ.എം. ആണ് സ്കൂൾ മാനേജർ . 2018-19 അധ്യയന വർഷം മുതൽ സ്കൂൾ മുസ്ലിം കലണ്ടറിൽ നിന്നും ജനറൽ കലണ്ടറിലേക്ക് മാറി. സ്കൂളിന്റെ പേര് ബാവുപ്പാറ എം.എൽ.പി. സ്കൂൾ എന്നത് അബ്ദുള്ള മെമ്മോറിയൽ എം.എൽ.പി.സ്കൂൾ കാഞ്ഞിരാട്ടുതറ, തിരുവള്ളൂർ എന്നാക്കി മാറ്റിയിട്ടുണ്ട്.